శంభో శివ శంభో-2... తీస్తాడా?

Posted: 03/13/2018 06:37 PM IST

రవితేజ కెరీర్ లో రీమేక్ లు పెద్దగా కలిసొచ్చిన దాఖలాలు లేవనే చెప్పాలి. వీడే, నా ఆటోగ్రాఫ్, శంభో శివ శంభో చిత్రాలు క్రిటిక్స్ ప్రశంసలు అందుకున్నప్పటికీ హిట్లుగా నిలవలేకపోయాయి. అయితే అల్రెడీ బాక్సాఫీస్ వద్ద బోల్తా పడ్డ చిత్రానికి సీక్వెల్ చేసే సాహసం రవితేజ ఇప్పుడు చేయబోతున్నాడా? అన్న చర్చ మొదలైంది.

కొన్నేళ్ల క్రితం తమిళంలో సముద్రఖని(రఘువరన్ లో ధనుష్ తండ్రి పాత్ర పోషించిన నటుడు) దర్శకత్వంలో 'నాడోడిగళ్' అనే సినిమా తీస్తే.. తమిళంలో అది బ్లాక్ బస్టర్ అయ్యింది. అదే తెలుగులో 'శంభో శివ శంభో' పేరుతో రీమేక్ చేస్తే బోల్తాపడింది. ఈ మధ్యే తమిళ్ లో 'నాడోడిగళ్' సినిమాకి సీక్వెల్ షూటింగ్ కూడా పూర్తి చేసుకుంది. సముద్రఖని డైరెక్షన్ లోనే ఈ చిత్రం రూపుదిద్దుకుంది.

అయితే దీనిని తెలుగులో కూడా ఒకేసారి చేయాలన్న ఆలోచనలో సముద్రఖని ఉన్నాడంట. సీక్వెల్ కథను రవితేజకు వినిపించడానికి ఆయన రెడీ అవుతున్నాడు. కానీ, తెలుగులో సక్సెస్ కాలేకపోయిన ఈ చిత్రాన్ని రవితేజ ఒప్పుకుంటాడా? అన్నదే ఇక్కడ అసలు అనుమానం.