‘గబ్బర్ సింగ్’తో మరోసారి పవర్ స్టార్

Posted: 05/25/2016 12:35 PM IST

Pawan kalyan once again with gabbar singh

ఒకప్పుడు ‘తొలిప్రేమ’, ‘బద్రి’, ‘ఖుషీ’ చిత్రాలు పవన్ కళ్యాణ్ కు భారీ ఫ్యాన్ ఫాలోయింగ్ ను తెచ్చిపెట్టాయి. ఆ తర్వాత దాదాపు చాలా ఫ్లాపుల తర్వాత మళ్లీ ‘గబ్బర్ సింగ్’ సినిమాతో ఆ ఫ్యాన్ ఫాలోయింగ్ కాస్త తారాస్థాయికి చేరుకుంది. పవర్ స్టార్ స్టామినాను ఆకాశానికి పెంచేసింది. ‘గబ్బర్ సింగ్’ సినిమా భారీ బ్లాక్ బస్టర్ హిట్టవ్వడమే కాకుండా కలెక్షన్ల మోత మోగించేసింది.

పవర్ స్టార్ పవన్ కళ్యాణ్ తో ఎప్పటికైనా ఓ సినిమా చేయాలని ఎంతో ఆశగా ఎదురుచూస్తున్న దర్శకుడు హరీష్ శంకర్ కు ‘గబ్బర్ సింగ్’ సినిమాకు దర్శకత్వం వహించే అవకాశం రావడంతో.. అసలే పవన్ కళ్యాణ్ కు వీరాభిమాని అయిన హరీష్ శంకర్... ‘గబ్బర్ సింగ్’ సినిమాను అద్భుతంగా రూపొందించాడు. పవర్ స్టార్ ను అభిమానులు ఎలా చూడాలనుకుంటున్నారో.. అంతకు మించిన రేంజులో ‘గబ్బర్ సింగ్’ను తీర్చిదిద్ది.. తన అభిమానాన్ని చాటుకున్నాడు.

ఆ తర్వాత తాజాగా మరోసారి పవర్ స్టార్ తో సినిమా చేసే ఛాన్స్ దక్కించుకున్నట్లుగా తెలుస్తోంది. ఇటీవలే హరీష్ శంకర్ ఓ పవర్ ఫుల్, స్టైలిష్ స్టోరీలైన్ తో పవన్ కళ్యాణ్ ను సంప్రదించి, కథ వినిపించాడట. ఆ కథ పవన్ కు బాగా నచ్చడంతో వెంటనే గ్రీన్ సిగ్నల్ ఇచ్చాడని సినీవర్గాల సమాచారం. ప్రస్తుతం ఆ కథను సిద్ధం చేసే పనిలో పడ్డాడట హరీష్ శంకర్. ఎందుకంటే అసలే పవన్ కళ్యాణ్ త్వరగా సినిమాలను పూర్తి చేసి రాజకీయాల్లోకి వెళతానని ప్రకటించిన విషయం తెలిసిందే.

అందుకే తను అనుకున్న కథను త్వరగా, పర్ఫెక్ట్ గా పూర్తిచేసుకుని సినిమా స్టార్ట్ చేయాలని హరీష్ శంకర్ భావిస్తున్నట్లుగా తెలిసింది. ఈ సినిమాను ప్రముఖ నిర్మాత ఎ.ఎం.రత్నం భారీ బడ్జెట్ తో నిర్మించడానికి సన్నాహాలు చేస్తున్నారు. ఎ.ఎం.రత్నంతో ఓ సినిమా చేయడానికి పవన్ ఇటీవలే మాటిచ్చాడని తెలిసిందే. అందుకే పవన్-హరీష్ శంకర్-ఎ.ఎం.రత్నం కాంబినేషన్లో ఈ ప్రాజెక్ట్ సెట్స్ పైకి వెళ్లనుందని సినీవర్గాల సమాచారం. త్వరలోనే అన్ని వివరాలను అధికారికంగా ప్రకటించనున్నారు.

ప్రస్తుతం పవన్ కళ్యాణ్ తన కొత్త సినిమా షూటింగ్ కోసం సిద్ధమవుతున్నాడు. ఎస్.జే.సూర్య దర్శకత్వంలో రూపొందనున్న ఈ సినిమా షూటింగ్ వచ్చే నెలలో ప్రారంభం కానుంది. ఇందులో శృతిహాసన్ హీరోయిన్ గా నటించనుంది. అనూప్ సంగీతం అందించనున్నాడు. త్వరలోనే చిత్ర యూనిట్ అధికారికంగా అన్ని వివరాలను తెలియజేయనున్నారు.

- Sandy