అదే రోజున ‘జనతా గ్యారేజ్’ ఫస్ట్ లుక్

Posted: 04/21/2016 01:37 PM IST

‘టెంపర్’ ‘నాన్నకు ప్రేమతో’ చిత్రాల తర్వాత యంగ్ టైగర్ ఎన్టీఆర్ నటిస్తున్న ‘జనతా గ్యారేజ్’ చిత్ర షూటింగ్ శరవేగంగా జరుగుతోంది. ‘మిర్చి’, ‘శ్రీమంతుడు’ వంటి వరుస హిట్ చిత్రాలతో దర్శకుడిగా తనకంటూ ఓ క్రేజ్ ను సొంతం చేసుకున్న కొరటాల శివ దర్శకత్వంలో రూపొందుతున్న ఈ చిత్రాన్ని మైత్రి మూవీ మేకర్స్ సంస్థ ప్రతిష్టాత్మకంగా నిర్మిస్తోంది.

మలయాళ సూపర్ స్టార్ మోహన్ లాల్ ముఖ్య పాత్రలో నటిస్తున్నారు. ఎన్టీఆర్-మోహన్ లాల్ కాంబినేషన్లో రూపొందుతున్న ఈ సినిమాపై అంచనాలు భారీగా పెరిగిపోయాయి. అయితే తాజా సమాచారం ప్రకారం ఈ చిత్ర ఫస్ట్ లుక్ విడుదలకు డేట్ ఫిక్స్ చేసినట్లుగా తెలుస్తోంది. ఎన్టీఆర్ పుట్టినరోజైన మే20న ‘జనతా గ్యారేజ్’ ఫస్ట్ లుక్ ను విడుదల చేసేందుకు చిత్ర యూనిట్ ఏర్పాట్లు చేస్తున్నట్లుగా తెలిసింది.

ఎన్టీఆర్ పుట్టినరోజుకు కానుకగా ‘జనతా గ్యారేజ్’ ఫస్ట్ లుక్ విడుదల చేసి, ఎన్టీఆర్ అభిమానులకు మరింత ఉత్సాహం కలుగజేయాలని చిత్ర యూనిట్ భావిస్తున్నారు. త్వరలోనే అధికారికంగా ప్రకటించనున్నారు. ఇందులో ఎన్టీఆర్ సరసన సమంత, నిత్యామీనన్ లు హీరోయిన్లుగా నటిస్తున్నారు. అలాగే మలయాళ నటుడు ఉన్ని ముకుందన్, నటి విదిశ కీలక పాత్రలలో నటిస్తున్నారు. రాక్ స్టార్ దేవిశ్రీప్రసాద్ సంగీతం అందిస్తున్నాడు.