నిత్యా భామతో సందీప్ రొమాన్స్?

Posted: 11/12/2015 10:56 AM IST

విభిన్న కథాంశాలతో ప్రేక్షకులను అలరిస్తున్న యువ హీరో సందీప్ కిషన్ ఈసారి గోల్డెన్ లెగ్ హీరోయిన్ తో జతకట్టేందుకు సిద్ధమయ్యాడు. ‘టైగర్’ చిత్రం తర్వాత సందీప్ కిషన్ హీరోగా నటిస్తున్న తాజా చిత్రం ‘ఒక్క అమ్మాయి తప్ప’. అంజిరెడ్డి ప్రొడక్షన్స్ బ్యానన్లో రూపొందుతున్న ఈ చిత్రానికి టి.రాజసింహ దర్శకత్వం వహిస్తున్నారు.

అయితే ఇందులో హీరోయిన్ గా గోల్డెన్ లెగ్ భామ నిత్యామీనన్ నటించబోతున్నట్లుగా వార్తలొస్తున్నాయి. గతకొద్ది కాలంగా ఈ అమ్మడు నటిస్తున్న సినిమాలన్నీ కూడా వరుసగా బ్లాక్ బస్టర్ హిట్స్ అవుతున్నాయి. కానీ నిత్యా మాత్రం తొందరపడి, ఎక్కువ సినిమాలకు కమిట్ అవ్వకుండా, సరైన కథలను ఎంచుకుంటూ ముందుకు సాగుతోంది.

ఇక ‘ఒక్క అమ్మాయి తప్ప’ సినిమాలో సందీప్ సరసన హీరోయిన్ గా నటించాలని చిత్ర దర్శకనిర్మాతలు ఈ అమ్మడిని సంప్రదించినట్లుగా తెలుస్తోంది. నిత్యామీనన్ కూడా ఈ చిత్ర కథ నచ్చడంతో గ్రీన్ సిగ్నల్ ఇచ్చేసారని సమాచారం. త్వరలోనే అధికారికంగా ప్రకటించనున్నారు. మిక్కీ జే మేయర్ సంగీతం అందిస్తున్న ఈ చిత్రంలో భోజ్ పురి నటుడు రవికిషన్ ఓ కీలక పాత్రలో నటించనున్నారు.