షాకింగ్ న్యూస్ : చిరు ప్రాజెక్ట్ నుంచి తప్పుకున్న పూరీ

Posted: 06/13/2015 01:20 PM IST

Puri jagannadh out from chiranjeevi 150th movie tollywood gossips

మెగాస్టార్ చిరంజీవి 150వ చిత్రం ఎప్పుడెప్పుడు మొదలవుతుందా..? అని ఎదురుచూసిన అభిమానులకు దర్శకుడు పూరీ జగన్నాథ్ ఇటీవలే ఓ స్వీట్ న్యూస్ ఇచ్చిన విషయం తెలిసిందే! పూరీ తాను తయారుచేసిన స్ర్కిప్ట్ ని చిరుకు వివరించగా.. అందుకు ఆయన ఆకర్షితుడైన గ్రీన్ సిగ్నల్ ఇచ్చారు. దీంతో తాను చిరు 150వ చిత్రాన్ని తెరకెక్కించనున్నట్లుగా పూరీ పేర్కొన్నాడు. ఇక ఇతనితోపాటు ఈ చిత్రాన్ని నిర్మించనున్న మెగాపవర్ స్టార్ రాంచరణ్ కూడా తన తండ్రి 150వ చిత్రాన్ని పూరీయే డైరెక్ట్ చేయనున్నట్లుగా స్పష్టం చేసిన వ్యవహారం తెలిసిందే!

ఇలా అందరూ చిరు 150వ చిత్రంపై స్పందించిన అనంతరం ఎవరి పనుల్లో వారు ఫుల్ బిజీ అయిపోయారు. ఓవైపు చిరంజీవి ప్రస్తుత ట్రెండ్ కి తగ్గట్టుగా స్టైలిష్ గా తయారవ్వడంలో, స్ర్కిప్ట్-ప్రీ ప్రొడక్షన్ పనుల్లో పూరీ - చెర్రీ ఇద్దరూ మునిగిపోయారు. ఈ చిత్రాన్ని 22వ తేదీన లాంఛనంగా ప్రారంభించి.. సెప్టెంబర్ నెల నుంచి రెగ్యులర్ షూటింగ్ జరిగేలా ప్లాన్ కూడా చేసుకున్నారు. అయితే.. ఇంతలోనే ఏం జరిగిందో ఏమో తెలీదు కానీ.. ఈ చిత్రానికి సంబంధించి ఓ వార్త ఇండస్ట్రీలో చక్కర్లు కొడుతోంది. చిరు 150వ మూవీ ప్రాజెక్ట్ నుంచి పూరీ తప్పుకున్నట్లు ఫిలింనగర్ లో పుకార్లు సంచలనం సృష్టిస్తున్నాయి. ఈ విధంగా ఈ పుకార్లు రావడంపై కొన్ని బలమైన కారణాలూ వున్నాయి.

ఇటీవలే దర్శకుడు పూరీ చాలా ప్రాజెక్టులను అనౌన్స్ చేసిన విషయం తెలిసిందే! మొదట నితిన్ అనుకున్న సినిమా క్యాన్సిల్ అయి వరుణ్ తో ఫిక్స్ అవడం, ఆ తర్వాత మహేష్ బాబు కోసం ఇప్పటికే స్టోరీ రెడీగా వుందని చెప్పడం, వీటికితోడు ఇతరులతో పూరీ మంతనాలు జరపడం వంటి విషయాలతో చిరంజీవి సంతోషంగా లేరని తెలుస్తోంది. తన ప్రాజెక్ట్ పై పూరీ పూర్తి శ్రద్ధ చూపించడం లేదన్న అభిప్రాయాన్ని చిరు వెల్లడించినట్లు తెలుస్తోంది. చాలాకాలం తర్వాత మళ్లీ రీఎంట్రీ ఇస్తున్న తన 150వ ప్రాజెక్ట్ ను పూరీ సమర్థవంతంగా తెరకెక్కించలేడన్న అనుమానాన్ని ఆయన తన సన్నిహితులతో వ్యక్తం చేశారట! తన చిత్రంపై కాకుండా ఇతర మూవీలపై పూరీ ఆసక్తి చూపడం చిరుని కాస్త ఇబ్బంది పెట్టినట్లుగా తెలుస్తోంది.

ఇంకొక సంచలన వార్త ఏమిటంటే.. ఈ గురువారం చిరంజీవి దర్శకుడు వివి వినాయక్ ని కలిశారని, దాదాపు ఒక గంటపాటు మంతనాలు జరిపారని సమాచారం! బహుశా చిరు తన 150వ చిత్రం గురించి చర్చించుకోవడం కోసమే వినాయక్ ఇంటికి వెళ్లారేమోనన్న అనుమానాలు వ్యక్తమవుతున్నాయి. ఈ వ్యవహారాలన్నింటిని గమనిస్తుంటే.. పూరీతో తన 150వ చిత్రం చేయడానికి చిరు అంతగా ఆసక్తి చూపడం లేదని అర్థమవుతోందని సినీ విశ్లేషకులు అంటున్నారు. మరి.. ఈ విషయంపై మరిన్ని వివరాలు తెలియాలంటే కొన్నాళ్లు ఆగాల్సిందే!