జ్యోతిక 36వయసుతో తెలుగులోకి రీఎంట్రీ

Posted: 05/21/2015 03:45 PM IST

ఒకప్పటి స్టార్ హీరోయిన్ జ్యోతిక దాదాపు తొమ్మిది ఏళ్ల తర్వాత ఇటీవలే ‘36 వయాధినిలే’ చిత్రం ద్వారా సినిమాల్లోకి రీఎంట్రీ ఇచ్చిన విషయం తెలిసిందే. ఈ సినిమా ఇటీవలే విడుదలై మంచి టాక్ తో కొనసాగుతోంది. హౌస్ ఫుల్ షోలతో మంచి కలెక్షన్లు రాబడుతున్నాయి. ఈ చిత్రాన్ని జ్యోతిక భర్త, ప్రముఖ తమిళ స్టార్ హీరో సూర్య స్వయంగా నిర్మించాడు.

అయితే సూర్య, జ్యోతికలు నటించిన చాలా చిత్రాలు ఇప్పటికే తెలుగులోకి డబ్బింగ్ అయ్యి, విడుదలైన విషయం తెలిసిందే. తాజాగా ‘36 వయాధినిలే’ చిత్రాన్ని కూడా తెలుగులోకి డబ్బింగ్ చేయాలనే ఆలోచనలో సూర్య వున్నాడట. జ్యోతికకు కూడా తెలుగులో అభిమానులున్నారు.

‘చంద్రముఖి’, ‘ఠాగూర్’, ‘మాస్’ వంటి పలు చిత్రాల్లో నటించి, తెలుగు ప్రేక్షకులకు దగ్గరయ్యింది జ్యోతిక. కాబట్టి ‘36 వయాధినిలే’ చిత్రాన్ని తెలుగులోకి డబ్బింగ్ చేస్తే, తెలుగులో కూడా మంచి విజయం సాధిస్తుందనే నమ్మకంతో వున్నాడు సూర్య. త్వరలోనే తెలుగు డబ్బింగ్ కార్యక్రమాలు ప్రారంభించనున్నారని తెలిసింది. త్వరలోనే అన్ని వివరాలు అధికారికంగా తెలియనున్నాయి.

ప్రస్తుతం సూర్య హీరోగా నటించిన ‘మాస్’ చిత్రాన్ని తెలుగులో ‘రాక్షసుడు’ పేరుతో విడుదల చేయనున్నారు. ఈ చిత్రాన్ని తెలుగు, తమిళ భాషలలో మే 29న ప్రపంచ వ్యాప్తంగా భారీ ఎత్తున విడుదల చేయనున్నారు. ఇప్పటికే విడుదలైన తెలుగు ట్రైలర్ కు మంచి స్పందన వచ్చింది. మరి ఈ సినిమా ఎలాంటి విజయం సాధించనుందో త్వరలోనే తెలియనుంది.