తల్లి వారసత్వాన్ని పుచ్చుకోనున్న తార..

Posted: 01/28/2015 04:06 PM IST

Fomer actress gowthami daughter subba lakshmi film industry entry

ప్రపంచంలో ఎక్కడాలేని విధంగా ఒక్క దక్షిణాది చిత్రపరిశ్రమలోనే వారసత్వ సంస్కృతి ఎప్పటినుంచో కొనసాగుతూ వస్తోంది. ఇండస్ట్రీలో స్టార్ ఇమేజ్ సాధించిన నటీనటుల వారసులు, వారసురాలే ఇండస్ట్రీలో తమ అదృష్టాన్ని పరీక్షించుకొంటుంటారు. ఈ జాబితాలో మొన్నటివరకు హీరోల అబ్బాయిలే వుండేవాళ్లు.. ఇప్పుడు హీరోయిన్ల కూతుళ్లు కూడా చేరిపోయారు. ఇలా వచ్చిన వాళ్లలో కొందరు బాగా సక్సెస్ అయినవాళ్లు కూడా వున్నారు. మరికొందరు అంతగా సక్సెస్ కాలేకపోయారు. అది వేరేవిషయం! తాజాగా తన తల్లి వారసత్వంతో మరో స్టార్ హీరోయిన్ కూతురు త్వరలోనే కథానాయికగా రంగప్రవేశం చేసేందుకు సిద్ధమవుతోంది.

నిన్నటితరం ప్రముఖ కథానాయిక అయిన గౌతమి కుమార్తె సుబ్బలక్ష్మీ నటనపై ఎక్కువ ఆసక్తి చూపుతోందని సమాచారం! ఆ విషయాన్ని గ్రహించిన తల్లి గౌతమి.. తన కుమార్తెకు ప్రస్తుతం నాట్యంలో ప్రత్యేకంగా ట్రైనింగ్ ఇప్పిస్తోందట! అంతేకాదు.. ఆమె హాజరయ్యే ప్రతి ఫంక్షన్’కు తన కూతుర్ని వెంటతీసుకెళ్లి అందరితోనూ పరిచయం చేయిస్తోంది. ఈ నేపథ్యంలోనే కొందరు దర్శకనిర్మాతలు ఆమెను కథానాయికగా పరిచయం చేస్తామంటూ ముందుకు వస్తున్నారట! అయితే.. తన కూతురి సినిమా ఎంట్రీ గురించి మాత్రం గౌతమి ఎలాంటి నిర్ణయాన్ని వెలువడించడం లేదని ఆమె సన్నిహితులు చెబుతున్నారు.

ఎందుకంటే.. సుబ్బలక్ష్మి ప్రస్తుతం పదహారేళ్ల వయస్సులో ప్రవేశిస్తోంది. ఇంకా ఈ అమ్మడు మేజర్ కాలేదు కాబట్టి.. అంతవరకు నటనలో ట్రైనింగ్ ఇప్పించి ఆ తర్వాత ఇండస్ట్రీలో కథానాయికగా పరిచయం చేయించాలనే ఉద్దేశంలో గౌతమి వున్నట్లు సన్నిహిత వర్గాలు పేర్కొంటున్నాయి. మరి.. నిన్నటివరకు తన కూతురిని ఫంక్షన్లకు తీసుకురాని గౌతమి.. ఇప్పుడెందుకు తీసుకు వస్తోంది..? అంటూ కొందరు పెదవి విరుస్తున్నారు. ఏదైతేనేం.. సుబ్బలక్ష్మీకి మాత్రం ఇప్పటినుంచే క్రేజ్ లభించడం మొదలైందని చెప్పుకుంటున్నారు.