లేని (నీలి) వార్తల పుట్టుకను ప్రశ్నించిన రాజమౌళి

Posted: 07/14/2014 11:50 AM IST

ఒకసారి ఒకే పనిలో నిమగ్నమై దానికి తన పూర్తి శక్తియుక్తులను సృజనాత్మకతను అంకితమిచ్చే దర్శకుడు రాజమౌళి లేని వార్తలు ప్రచారంలోకి రావటాన్నిచూసి అసలు అలాంటి వార్తలు ఎలా పుట్టుకొస్తాయంటూ ప్రశ్నిస్తున్నారు.  

ఆకలి లేకపోయినా మసాలా ఘుమఘుమలతో ఆకర్షించి తినేట్టుగా చేసే ఫాస్ట్ ఫుడ్ సెంటర్లలాగా వార్తలలో మసాలా దట్టించి వాటిని చదివి ఆస్వాదించేట్టుగా చేసే వార్తాహరులు కొందరు రాజమౌళి తదుపరి ప్రాజెక్ట్ గురించి వాళ్ళ బుర్రల్లో తళుక్కుమన్న ఆలోచనను నిజమైన వార్తలాగానే చెప్పేసారు.  అదేమీ ఎవరినీ కించపరచేది, ఎవరికీ నష్టపరచేదీ కాదనుకోండి కానీ రాజమౌళి దాని మీద కూడా స్పందించారు.

ఇంతకీ ఆ వార్త ఏమిటంటే రణబీర్ కపూర్, జెట్ లీ లతో రాజమౌళి హాలివుడ్ సినిమానోదాన్ని ప్లాన్ చేస్తున్నారని ఒక ఇంగ్లీష్ పత్రిక కథనం.  హాలీవుడ్ సినిమా తియ్యటం అంత సులువా, టికెట్ కొని ఫ్లైట్ ఎక్కినంత సులభమా ఏమిటి అన్న రాజమౌళి ఎలా పుట్టుకొస్సాయీ వార్తలు అంటూ ట్వీట్ చేసారు.  తానేం చెయ్యదలచుకున్నా ముందు చెప్పే చేస్తాను కాబట్టి ఇలాంటి వార్తలను ఎవరూ నమ్మవద్దని కూడా ఆయన చెప్పారు.

ప్రస్తుతం బాహుబలి సినిమా నిర్మాణం కోసం అహోరాత్రులు శ్రమిస్తున్న రాజమౌళి అది పూర్తి కాకుండానే మరో పెద్ద ప్రాజెక్ట్ కి ప్రణాళికలను సిద్ధం చేస్తారని ఎలా అనుకున్నారసలు?

-శ్రీజ