ముద్దుల కొడుకుతో జెనీలియా దంపతులు

Posted: 05/27/2015 11:45 AM IST

తెలుగులో ‘బొమ్మరిల్లు’ సినిమాతో భారీ క్రేజ్ ను దక్కించుకున్న క్యూట్ ఎనర్జిటీక్ స్మైలింగ్ హీరోయిన్ జెనీలియా... ఆ తర్వాత ‘రెడీ’, ‘ఢీ’, ‘ఆరెంజ్’, ‘హ్యాపీ’, ‘శశిరేఖపరిణయం’ వంటి ఎన్నో హిట్ చిత్రాల్లో నటించింది. తెలుగులోనే కాకుండా పలు తమిళ, హిందీ చిత్రాల్లో కూడా నటించి మంచి మార్కులు కొట్టేసింది. ఆ తర్వాత బాలీవుడ్ హీరో రితేష్ దేశ్ ముఖ్ తో ప్రేమలో పడి, ప్రేమ వివాహం చేసుకుంది. ఆ తర్వాత సినిమాలకు బ్రేక్ ఇచ్చేసింది.

ఇటీవలే ఈ జంటకు ఓ బాబు కూడా జన్మించిన విషయం తెలిసిందే. ఈ బాబుకు ‘రియాన్ రితేష్ దేశ్ ముఖ్’ అనే పేరు కూడా పెట్టారు. అయితే ఈ బాబుకు సంబంధించిన తాజా ఫోటోలను ఇటీవలే విడుదల చేసారు. ఈ ఫోటోలు ప్రస్తుతం సోషల్ మీడియాలో తెగ హల్చల్ చేస్తున్నాయి. ఇందులో రియాన్, జెనీలియా, రితేష్ ల అనుబంధం, అప్యాయతలు చూస్తుంటే ముచ్చటేస్తుంది.

హిందీలో వరుస సినిమాలతో బిజీగా వున్నాడు రితేష్. అలాగే మళ్లీ సినిమాల్లోకి రీఎంట్రీ ఇవ్వడానికి జెనీలియా సిద్ధమవుతోంది. నటిగా మంచి పాత్రలొస్తే సౌత్ లో కూడా చేయడానికి జెనీలియా సిద్ధంగా వుందట. మరి జెనీలియా రీ ఎంట్రీ ఏ సినిమాతో రానుందో చూడాలి.