‘నైట్ షో’ చూయిస్తుందనుకుంటే.. ‘మాయ’ చేసేసింది!

Posted: 02/26/2015 12:45 PM IST

Nayanatara maya tamil movie mayuri telugu dubbing

మూడుపదుల ముద్దుగుమ్మ నయనతార తన సెకండ్ ఇన్నింగ్స్ ని మరింత వేగవంతం చేసినట్లు కనిపిస్తోంది. చిన్నాపెద్దా హీరోలంటూ తేడాలేకుండా అందరితోనూ నటిస్తోంది. అలాగే.. లేడీ ఓరియెంటెడ్ కమర్షియల్ చిత్రాల్లోనూ నటిస్తోంది. ఈ నేపథ్యంలోనే ఈమెకు తమిళంలో ఓ హీరోయిన్ ప్రధాన చిత్రం వరించింది.

దర్శకుడిగా పరిచయమవుతున్న అశ్విన్ శరవణన్ దర్శకత్వంలో తెరకెక్కుతున్న లేడీ ఓరియెంటెడ్ చిత్రంలో నయనతార నటిస్తోంది. ఈ చిత్రానికి ముందుగా ‘నైట్ షో’ అనే టైటిల్ దర్శకనిర్మాతలు పెట్టారు. అయితే.. ఆ టైటిల్ నయనకు నచ్చకపోవడంతో దాన్ని ‘మాయ’గా మార్చాల్సిందిగా సూచించిందట! దాంతో ఆ మూవీ టైటిల్ ని ‘మాయ’గా మార్చడం జరిగింది. ఈ చిత్రంలో విశేషం ఏమిటంటే.. నయనతార తల్లి పాత్రలో నటిస్తోంది.

ఇదిలావుండగా.. ఇప్పుడు ఈ చిత్రాన్ని తెలుగులోనూ అనువదించే ప్రయత్నాలు చేస్తున్నారు. ‘మయూరి’ పేరిట తెలుగులో విడుదల చేసేందుకు దర్శకనిర్మాతలు అన్ని ఏర్పాట్లు సిద్ధం చేసుకున్నారు. త్వరలోనే మరిన్ని వివరాలు వెలువడి కానున్నాయి.