చలికాలంలో ఎక్కువగా ముఖం కడగటం చాలా తప్పు

Posted: 12/18/2014 04:40 PM IST

ముఖం కడిగితే మురికిపోయి నీట్ ఉంటాము అనుకోవటం సహజం. ఇది కరెక్టే కానీ చలికాలంలో మాత్రం తరుచుగా ముఖం కడగటం వల్ల లాభాల కంటే నష్టాలే ఎక్కువగా ఉన్నాయి. వాతావరణ మార్పులు, ఉష్ణోగ్రతలు తగ్గటం వల్ల చర్మంపై దురద, పగుళ్ళు ఎక్కువగా వస్తాయి. కాబట్టి తరుచుగా ముఖం వాష్ చేయటం వల్ల మంట వచ్చి ముఖం ఎర్రగా మారే ప్రమాదం ఉంది. కాబట్టి ముఖం కడగటం తగ్గించటంతో పాటు.., చలికాలంలో ముఖం కడిగే టప్పుడు పాటించాల్సిన చిట్కాలేమిటో చూద్దాం.

ఫేస్ వాష్ క్రీముల ఎంపిక : ముఖం నీటుగా ఉంచుకునేందుకు ఏవేవో క్లెన్సర్లు ఉపయోగిస్తుంటాము. అయితే ఇవన్నీ చలికాలంలో పనిచేయటం అటుంచితే హాని ఎక్కువగా కల్గిస్తాయి. కాబట్టి.., టట్రీ ఆయిల్ లేదా సలిసిలిక్ ఆయిల్ తో తయారైన క్లెన్సర్స్ అయితే ఉత్తమం.

మాయిశ్చరైజర్ ఉపయోగించటం : సాధారణంగా చలికాలంలో బయటకు వెళ్లేటపుడో లేదా.., పడుకునే సమయంలోనే మాయిశ్చరైజర్ ఉపయోగిస్తాము. కాని తెలియని విషయం ఏమంటే.., ముఖం కడిగిన వెంటనే మాయిశ్చరైజర్ రాసుకోవాలి. ఇలా చేయటం వల్ల ముఖం పొడిబారి దురద వచ్చే అవకాశం తక్కువ.

రాత్రి పడుకునే ముందు ముఖం కడగాలి : చర్మంపై దుమ్ము, దూళి ఉంటుందన్న విషయం తెలిసిందే. పడుకునే ముందు ముఖంను శుభ్రం చేసుకోకపోతే.., ఇది అలాగే ఉండి చర్మాన్ని పాడు చేస్తుంది. కాబట్టి పడుకునేముందు ఖచ్చితంగా ముఖాన్ని కడగాలి. ఇక ముఖం కడిగాక ఎలాగూ మాయిశ్చరైజర్ రాసుకోవాలని చెప్పాము.

మంచి టవల్ వాడాలి : ముఖం కడిగిన తర్వాత మురికిగా ఉన్న టవల్ తో తుడుచుకుంటే.., మన కష్టం, ప్రయత్నం బూడిదలో పోసిన పన్నీరే అవుతుంది. అప్పటికే టవల్ పై మురికిలో ఉన్న క్రిములన్నీ మళ్ళీ ముఖానికి వచ్చి అంటుకుని ప్రయోజనం ఉండదు. కాబట్టి నీట్ గా ఉండే టవల్ వాడాలి.

ముఖానికి వేడినీళ్లను వాడకండి : చలిని తట్టుకోలేక స్నానం, ముఖం కడిగేందుకు వేడి నీళ్లను అందరూ ఉపయోగిస్తుంటారు. స్నానానికి అయితే తప్పదు కాబట్టి ఉపయోగించాలి. కాని ఇదే బద్దకం ముఖం విషయంలో పాటిస్తే.., ముడతలు వస్తాయి. కాబట్టి చల్లని నీళ్ళతో ముఖం కడగండి. తప్పదనకుంటే గోరువెచ్చని నీటిని ఉపయోగించండి. అంతేకానీ వేడి నీటిని ముఖానికి తాకనివ్వకండి.

వీటితో పాటు చర్మం తీరును బట్టి, మాయిశ్చరైజర్లు, లోషన్లు, క్రీములు వాడవచ్చు. కానీ వాటిలో కలిపే రసాయనాలు, వాటి గాఢతలు తెలుసుకుని వాడండి. లేకపోతే సౌందర్య లేపనాలతో అందం రావటం అటుంచితే.., అంద విహీనంగా తయారవుతారు.