ITEMVIDEOS: మనసు గెలుచుకున్న హైదరాబాద్ పోలీసులు..

Posted: 10/08/2018 05:56 PM IST

Cops become good samaritans in hyderabad

మొన్న ఈ మధ్యే ఉత్తరభారతావనిలో పోలీసు కానిస్టేబుల్ చిన్నారి చంటిబిడ్డను లాలించి.. తల్లి కోసం అంగలార్చకుండా చేసిన ఘటన వైరల్ గా మారింది. అయితే అక్కడే కాదు ఇక్కడ మన రాష్ట్రంలో అందులోనూ హైదరాబాద్ మహనగరంలోని పోలీసులు కూడా అందరి మనస్సులను గెలుచుకున్నారు. తబలొ కూడా మంచితనానికి కొదవ లేదని.. రుజువు చేసుకున్నారు. ఎంతలా అంటే ఇప్పుడు వారికి సంబంధించిన వీడియో సోషల్ మీడియాలో వైరల్ అయ్యేంత.

నమ్మశక్యంగా లేదా.? కానీ ఇది నిజం. ఓ తల్లి తన ఆరు మాసాల చంటి బాబును ఎత్తుకుని పరీక్షా కేంద్రానికి వచ్చి గ్రూప్ 4 పరీక్ష రాసేందుకు వెళ్లింది. అయితే చంటిబిడ్డ కూడా వుండటంతో అమె తన వెంట తన చెల్లిని కూడా తెచ్చుకుంది. ఇక పరీక్ష రాసేందుకు అమె పరీక్షా కేంద్రంలోనికి వెళ్లింది. ఆ తరువాత కొద్ది సేపటికీ ఆ చంటి బిడ్డ తన తల్లి కోసం అంగలార్చుతూ ఏడవడం ప్రారంభించింది. తన పిన్ని ఎత్తుకుని ఎంతగా ఓదార్చినా ఆరు నెలల చంటిబిడ్డ మాత్రం తన తల్లినే కోరుకుంది. అంతే గుండలవిసేలా ఏడుస్తూనే వుంది.

ఈ విషయాన్ని అదే పరీక్షా కేంద్రం వద్దనునున్న జీ జే దివాకర్ అనే కానిస్టేబుల్ సహా ఆరుగురు కానిస్టేబుళ్ల బృందం గమనించింది. వెంటనే వారు చంటిబిడ్డను తమ చేతుల్లోకి తీసుకుని ఓదార్చడం ప్రారంభించారు. ఇక బిడ్డ పాల కోసం ఏడుస్తుందని తెలుసుకున్న పోలీసులు పాలసీసాతో బిడ్డకు పాలు కూడా తాగించారు. చివరకు ఎలాగోలా వారందరూ కలసి బిడ్డను నిద్రలోకి జారుకునేలా చేశారు. ఈ ఘటన హైదరాబాద్ లోని పార్సీ పాఠశాల వద్ద చోటుచేసుకుంది. ఈ వీడియోను కొందరు తమ సెల్ ఫోన్లలో బంధించి.. దానిని నెట్టింట్లో అప్ లోడ్ చేయడంతో అదికాస్తా వైరల్ అయ్యింది. ఈ పోలీసులు కూడా మంచి మనస్సునోళ్లే అంటూ నెట్ జనులు ప్రశంసలు కురిపిస్తున్నారు.