అనాథ బాలుడిపై ఠాణాలోనే కానిస్టేబుల్ పాడు పని..

Posted: 10/03/2018 02:41 PM IST

ఉత్తర్ ప్రదేశ్ పోలీసుల తీరుపై ఇప్పటికే పలు రకాల విమర్శలు వెల్లువెత్తుతున్న క్రమంలో ఉన్నాతాధికారులు వాటిని రూపుమాపేందుకు ఎన్నో ప్రయత్నాలు చేస్తున్నారు. మీడియా సాక్షిగా చేసుకుని మరీ ఎన్ కౌంటర్ చేసిన పోలీసులు అక్కడ కూడా విమర్శలను ఎదుర్కొన్నారు. ఇలా విమర్శలను బాపుకునే ప్రతీ ఘటనలో వారు విమర్శల పాలవుతున్న క్రమంలో మరోమారు అదే విభాగానికి మచ్చ తెచ్చే ఘటన ఒకటి చోటుచేసుకుంది.

ఉత్తర్ ప్రదేశ్ లోని చామద్ గేట్ పోలీస్‌ స్టేషన్ లోనే ఈ ఘటన చోటుచేసుకుంది. పోలిస్ స్టేషన్ వేదికగా చేసుకుని అక్కడి ఓ బాలుడితో కొద్ది రోజులుగా అసహజ లైంగిక దాడికి పాల్పడ్డాడు ఓ కానిస్టేబుల్‌. అసహజ లైంగిక దాడికి పాల్పడటంతో పాటు వికృత చేష్టలతో తనను బౌతికంగా కూడా వేధించేవాడు. సదరు కానిస్టేబుల్ సెలవుపై వెళ్లడంతో.. ఆ విషయం తెలియక స్టేషన్ కు వచ్చిన బాలుడి అక్కడ వున్న ఉన్నతాధికారులకు విషయాన్ని చెప్పాడు. దీంతో ఆ కానిస్టేబుల్ ను యూపీ పోలీసులు సస్పెండ్‌ చేశారు.

యుపీలోని చామద్‌ గేట్‌ పోలీస్‌ స్టేషన్లో కానిస్టేబుల్ గా పనిచేస్తున్న 45 ఏళ్ల సంజేశ్‌ యాదవ్‌ అనే కానిస్టేబుల్‌ ఈ అఘాయిత్యానికి పాల్పడ్డట్లు నిర్థారించుకున్న పోలీసులు అతడిపై వెంటనే సస్పన్షన్ వేటు వేశారు. వారు తెలిపిన వివరాల ప్రకారం.. అనాథ అయిన ఓ బాలుడు రోడ్డు పక్కనున్న చిన్న హోటల్‌లో పనిచేసుకుంటున్నాడు. ఓ సారి గస్తీ నిర్వహిస్తున్న కానిస్టేబుల్‌ సంజేశ్‌ యాదవ్‌ అల్పాహారం చేసేందుకు అక్కడికి వెళ్లాడు. బాలుడ్ని మచ్చిక చేసుకొని తరచూ పోలీస్‌ స్టేషన్‌కు తీసుకొచ్చేవాడు.

సెప్టెంబరు 9 నుంచి అక్టోబరు 1 మధ్య తరచూ బాలుడ్ని స్టేషన్‌కు రప్పించి అతడితో అసహజ లైంగిక చర్యలకు పాల్పడేవాడని పోలీసులు తెలిపారు.ఈ నెల 2న కానిస్టేబుల్‌ సెలవుపై వెళ్లడంతో స్టేషన్‌కు వచ్చిన బాలుడు పోలీసు ఉన్నతాధికారులకు జరిగిన విషయం చెప్పాడు. వికృత చేష్టలు చేయడమే కాకుండా తనను భౌతికంగా గాయపర్చేవాడని ఆవేదన వ్యక్తం చేశాడు. దీంతో బాలుడికి వైద్య పరీక్షలు జరిపించి.. బాలల లైంగిక వేధింపుల చట్టం (పోక్సో) కింద కానిస్టేబుల్‌పై కేసు నమోదు చేసినట్లు పోలీసు ఉన్నతాధికారి ఒకరు తెలిపారు.