సినీఇండస్ట్రీలో సమస్యలపై తెలంగాణ సర్కార్ కీలక నిర్ణయాలు

Posted: 04/21/2018 06:38 PM IST

తెలుగు సినీ పరిశ్రమను కుదిపేస్తోన్న సమస్యలపై తెలంగాణ ప్రభుత్వం చొరవ చూపుతూ మూవీ ఆర్టిస్ట్‌ అసోసియేషన్‌తో పాటు పలువురు సినీ పెద్దలతో ఈ రోజు చర్చలు జరిపింది. తెలంగాణ సినీమాటోగ్రఫీ శాఖ మంత్రి తలసాని శ్రీనివాస్‌ యాదవ్‌ ఆధ్వర్యంలో జరిగిన ఈ చర్చల్లో కీలక నిర్ణయాలు తీసుకున్నారు. చలనచిత్ర అభివృద్ధి సంస్థ ద్వారా ఆర్టిస్టులకు గుర్తింపు కార్డులు ఇవ్వాలని నిర్ణయించామని తలసాని శ్రీనివాస్ యాదవ్ అన్నారు.

కీలక నిర్ణయాలివే...
* చలనచిత్ర అభివృద్ధి సంస్థ ద్వారా ఆర్టిస్టులకు గుర్తింపు కార్డులు
* సినీ పరిశ్రమలో మధ్యవర్తులకు చెక్
* నటీనటులకు మేనేజర్ల ద్వారా నేరుగా బ్యాంకు ఖాతాలకు చెల్లింపులు
* మహిళలపై వేధింపులు, లైంగిక దాడుల విషయంలో ప్రభుత్వం కఠినంగా వ్యవహరిస్తుంది.

ఇక ఈ వివాదాన్ని ఇక్కడితో నిలిపివేయాలని పరిశ్రమను, మీడియాను కోరుతున్నానని అన్నారు. మహిళలు, నటులు ఏమైనా సమస్యలు ఉంటే పోలీసుల దృష్టికి తీసుకురావాలని అన్నారు. కాగా ఈ సమావేశానికి మా అధ్యక్షుడు శివాజీ రాజా, తమ్మారెడ్డి భరద్వాజ, జీవితా రాజశేఖర్, టీఫ్‌డీసీ చైర్మన్ రామ్మోహన్ రావు, ఎన్. శంకర్‌తో పాటు పలువురు సినీ ప్రముఖులు పాల్గొన్నారు. అయితే ఈ కీలక నిర్ణయాలపై ఇండస్ట్రీలో వేధింపులు ఎదుర్కొన్న బాధితులు ఎలా స్పందిస్తారో వేచి చూడాల్సిందే.