భారీ విధ్వంసకుట్ర భగ్నం.. 12 మంది జైషే ఉగ్రవాదుల అరెస్టు..

Posted: 05/04/2016 12:59 PM IST

Delhi police detain 12 suspected jaish terrorists in overnight raids

ఢిల్లీ పోలీసులు మరో పెను విధ్వంస రచన కుట్రను భగ్నం చేశారు. భారత్ దేశ రాజధాని ఢిల్లీ సహా పలు మహానగరాలలో విధ్వంస రచనకు కుట్ర పన్ని దానిన అమలు చేసే లక్ష్యంలో భాగంగా వ్యూహరచన చేసిన పాకిస్తాన్ ప్రేరేపిత జైషే మహ్మద్ ఉగ్రవాద సంస్థకు చెందిన 12 మంది అనుమానితులను ఢిల్లీ పోలీసులు ఇవాళ అదుపులోకి తీసుకున్నారు. రాత్రికి రాత్రి విస్తృతంగా జరిపిన తనిఖీలలో వీరిని పోలీసులు అదుపులోకి తీసుకుని అరెస్టు చేశారు. వీరి నుంచి పెద్ద ఎత్తున్న పేలుడు సామాగ్రిని కూడా పోలీసులు స్వాధీనం చేసుకున్నారు.

ఉగ్రవాద కదలికలపై నిఘా వర్గాల సమాచారం మేరకు పోలీసులు ఢిల్లీ నగరంలోని పలు ప్రాంతాల్లో అర్థరాత్రి నుంచి తెల్లవారుజాము వరకు పోలీసులుత విస్తృత సోదాలు చేపట్టారు. 12 బృందాలు తనిఖీల్లో పాల్గొన్నాయి. ఈ సందర్భంగా నిందితుల వద్ద నుంచి బాంబుల తయారీకి ఉపయోగించే పదార్థాలతో పాటు పలు పేలుడు పదార్థాలను భారీగా స్వాధీనం చేసుకున్నారు. దేశ రాజధాని నగరంతో పాటు ఢిల్లీ పరిసర ప్రాంతాలలోనూ భారీ విధ్వంసానికి పాల్పడేందుకు ఉగ్రవాదులు కుట్ర పన్నారు. అప్రమత్తమైన పోలీసులు ప్రముఖ ప్రఖ్యాత స్థలాలు, ప్రభుత్వ కీలక భవనాల వద్ద భద్రతను కట్టుదిట్టం చేశారు.

ముందుగా జైషే మహమ్మద్ సంస్థకు చెందిన ఇద్దరు అనుమానితులను ఢిల్లీలోని గోరఖ్ పూర్ ప్రాంతంలో పోలీసులు అదుపులోకి తీసుకుని ప్రశ్నించగా, డొంకంతా కదిలింది. వారు వెల్లడించిన వివరాల మేరకు మిగతావారిని పట్టుకున్నారు పోలీసులు. దీంతో దేశంలో ఉగ్రవాద విధ్వంస రచనను పోలీసులు భగ్నంచేశారు. పోలీసుల అదుపులో వున్నవారంతా స్లీపర్ సెల్స్ అని పోలీసులు అనుమానిస్తున్నారు. జైషే ఉగ్రవాదులు విధ్వంసానికి కుట్రపన్నుతున్నారన్న వార్తల నేపథ్యంలో ఢిల్లీ, ఉత్తర్ ప్రధేశ్ సహా పలు రాష్ట్రాలలో పోలీసుల పహారాను కట్టుదిట్టం చేశారు.

మనోహర్