కుల రక్కసి కాటు.. 5గురు మహిళల నగ్న ఊరేగింపు

Posted: 05/19/2015 08:35 PM IST

ఉత్తరప్రదేశ్ తో కులం రక్కసి మరోసారి కాటు వేసింది. అమాయకురాళ్లయిన ఐదుగురు ఆడపడచుల మానాన్ని బజారుపాలు చేసింది. సభ్య సమాజం తలదించుకునేలా చేసిన ఈ ఘటన షాజహాన్పూర్ జిల్లా హరేవా ప్రాంతంలో చోటుచేసుకుంది. అయిదుగురు దళిత మహిళలను.. గ్రామం నడిబోడ్డు నుంచి సమీపంలోని జాతీయ రహదారి వరకు కులసంఘాల నేతలు నగ్నంగా  ఊరేగించారు. ఐదు గంటల పాటు ఈ దారుణ ఘటన జరిగినా.. పోలీసులు మాత్రం అక్కడికి చేరుకోలేదు. ప్రథాని నరేంద్రమోడీ తన విదేశీ పర్యటనలలో ఇప్పడు భారత దేశీయులమంటూ గర్వంగా చెప్పుకునే రోజులు వచ్చాయని ప్రకటనలు చేస్తున్న తరుణంలో భారత్ తో కుల రక్కస్సులు, మానభంగాలతో, అత్యాచారాలు, గ్యాంగ్ రేప్ లతో బాసిల్లుతుంది. ఇదే నా మన భారతం అని దిగజారే స్థాయికి పడిపోతోంది.

వివరాల్లోకి వెళ్తే.. తమ అమ్మాయి  దళిత యువకుడితో వెళ్లిపోవడంతో  ఆగ్రహంతో రగిలిపోయిన బీసి వర్గానికి చెందిన గ్రామస్తులు మంగళవారం ఉదయం దళిత మహిళలపై విరుచుకుపడ్డారు. బూతులు తిడుతూ వారిని ఇళ్లల్లోంచి బయటకు లాక్కొచ్చారు. చెప్పులతో కొట్టి అమానించారు..  నట్టనడివీధికి తీసుకొచ్చి ఘోరంగా అవమానించారు. ఒంటిపై ఉన్న దుస్తులను లాగేసి వివస్త్రలను చేశారు.  ఆ తర్వాత  ప్రధాన రహదారిపై ఊరేగించారు. దాదాపు అయిదు గంటలపాటు ఈ అమానుషకాండ కొనసాగింది.  ఇంత జరుగుతున్నా ఎవరూ ఆపే ప్రయత్నం చేయలేదు. అంతేకాదు పోలీసులు అటువైపుకు రాలేదు.

ఆలస్యంగా నిద్రలేచిన పోలీసులు.. జరగాల్సిన అమానుష కాండ జరిగిపోయిన తరువాత.. గ్రామంలో పికెట్ ఏర్పాటు చేశారు. పరిస్థితిని సమీక్షిస్తున్నామని సీనియర్ పోలీసు అధికారి ఒకరు తెలిపారు.  దీనిపై సమగ్ర దర్యాప్తు జరిపించి, బాధ్యులపై కఠిన చర్యలు తీసుకుంటామన్నారు.  ఈ ఘటనకు సంబంధించి ఇప్పటివరకు  అమ్మాయి తండ్రితో సహా నలుగురు వ్యక్తులను  అదుపులోకి తీసుకున్నామన్నారు.  ఈ ఘటనపై రాష్ట్ర డీజీపీ విచారణకు ఆదేశించారు. మరోవైపు  దీనిపై రాజకీయ పార్టీలు  స్పందించాయి. బాధితులకు  న్యాయం జరగాలని డిమాండ్ చేస్తున్నాయి.  నిర్లక్ష్యంగా వ్యవహిరించిన పోలీసులు చర్యలు తీసుకోవాలంటున్నాయి.

జి. మనోహర్