Posted: 02/16/2013 06:45 PM IST

మండల కేంద్రానికి సుదూరంలో వున్న బూదరాళ్ల పంచాయతీ గరిమండ, పిట్టలపాడు, వంతమర్రి, కునుకూరు; వెలగలపాలెం పంచాయతీ కిత్తాబు గ్రామాలకు ఇంత వరకు విద్యుత్ సదుపాయం లేదు. దట్టమైన అడవులు, ఎత్తైన కొండలు, కనీస రహదారి లేకపోవడంతో విద్యుత్ లైన్లు వేయడం సాధ్యం కావడం లేదు. ప్రధాన రహదారి నుంచి సుమారు 30-50 కిలోమీటర్ల మేర నడిస్తేగాని ఈ గ్రామాలకు చేరుకోలేం. ఇటువంటి గ్రామాలకు ఎలాగైనా విద్యుత్ సదుపాయం కల్పించాలని ఈపీడీఎస్ఎల్ అధికారులు నిశ్చయించారు.డీడీజీఎస్ సిస్టమ్‌లో సోలార్ ఫొటోవాల్టాక్(ఎస్‌పీసీ) పద్ధతి కింద విద్యుత్ సదుపాయం కల్పించడానికి తొల దశలో ఈ ఐదు గ్రామాలను ఎంపిక చేశారు.

సుమారు కోటి 25 లక్షల రూపాయలతో ఆయా గ్రామాల్లో విద్యుత్ బ్యాంకులు నిర్మించారు. గ్రామంలో వున్న ఇళ్ల సంఖ్యనుబట్టి గ్రామానికి 20 నుంచి 25 లక్షల రూపాయల వరకు ఖర్చు చేశారు. ప్రిమియర్ సోలార్ కంపెనీ ఆధ్వర్యంలో ఒక్కొక్క గ్రామానికి నాలుగు నుంచి పది కిలోవాట్ల విద్యుత్ ఉత్పత్తి అయ్యేలా ప్యానల్స్ ఏర్పాటు చేశారు. ప్రతి ఇంటికి 140 వాట్ల సామర్థ్యంతో విద్యుత్ సరఫరా అయ్యేలా కనెక్షన్‌లు ఇచ్చారు. దీనితో ప్రతి ఇంటిలో రెండు లైట్లు, ఒక ఫ్యాన్, ఒక ప్లగ్ ఏర్పాటు చేసుకోవచ్చు. ప్రస్తుతం వసూలు చేస్తున్న విద్యుత్ చార్జీల ప్రకారమే వినియోగదారుల నుంచి బిల్లు వసూలు చేస్తారు. దీని కోసం ఇళ్లల్లో మీటర్లు కూడా అమర్చారు.

త్వరలో మరో 15 గ్రామాలకు.. మండలంలో మూరుమూలన వున్న మరో 15 గ్రామాలకు కూడా సుమారు రూ.4 కోట్ల వ్యయంతో ఇదే విధానంలో విద్యుత్ సదుపాయం కల్పిస్తామని స్థానిక ఏఈ శ్యామ్‌కుమార్‌సాహు చెప్పారు. ప్రస్తుతం పనులు జరుగుతున్నాయని, మరో నెల రోజుల్లో ఈ గ్రామాలు కూడా విద్యుత్ వెలుగులకు నోచుకుంటాయని చెప్పారు.