కోపాన్ని అదుపులో వుంచుకోవడానికి హెల్తీ టిప్స్!

Posted: 10/09/2014 03:27 PM IST

సాధారణంగా మానవులందరికీ భావోద్వేగాలు వుండటం సహజం. అవి సందర్భాలను బట్టి ఒక్కొక్కటి ఒక్కొక్క విధంగా బయటకు వస్తూ వుంటాయి. సంతోష భావోద్వేగాలు ఆరోగ్యానికి చాలావరకు మంచి చేస్తాయి కాబట్టి వాటి గురించి చర్చించుకోవాల్సిన అవసరం అంతగా లేదు. కానీ కోపం లాంటి భావోద్వేగం ఆరోగ్యానికి ఎంతో హానికరం. నిజానికి మానవులు మానిసకంగా కృంగిపోతున్న సమయంలోనే కోపం వస్తుంది. అలాకాకకుండా ప్రతిచిన్న విషయాలకు కోపాద్రిక్తులైతే మాత్రం ఆరోగ్యానికి హానికరమైన సంకేతంగా నిలుస్తుంది. కోపాన్ని చాలావరకు బయటవదిలేస్తేనే మంచి కానీ.. దానిని లోపలే అణుచుకుంటే మాత్రం ఆరోగ్యానికి విషపూరితంగా మారిపోతుంది. అంటే.. ఎట్టిపరిస్థితుల్లోనూ కోపం మానవునికి ఏదోఒకరకంగా హానికరమైన సంకేతంగానే నిలుస్తోంది. అటువంటి సమయాల్లో ఆ కోపాన్నే అదుపులో వుంచుకుంటే చాలా మంచిది. మరి ఈ కోపాన్ని అదుపులో వుంచే ఆ హెల్తీ మార్గాలేంటో ఒకసారి తెలుసుకుందాం....

1. సహజంగా కోపం అనేది కొన్ని కారణాల వల్ల వస్తుంది కాబట్టి.. అటువంటి కారకాల నుంచి దూరంగా వెళ్లిపోవడం ఎంతో ఉత్తమమైనది. ఇంట్లోవున్నవారితో వాగ్యుద్ధానికి దిగడం, ఇంకా ఇతర కారణాల వుండొచ్చు. అటువంటి సమయాల్లో కోపం వస్తుందని భావన కలిగితే.. ఆ కారకాల నుంచి దూరంగా జరిగితే చాలా మంచిది. అప్పుడు వెంటనే బయటకువెళ్లిన అనంతరం లోతైన శ్వాస తీసుకోవాలి. ఈ సిస్టమ్ లో ఎక్కువ ఆక్సిజన్ శరీరంలోకి ప్రవేశించి, కోపాన్ని చాలావరకు తగ్గించి, మెదడులో వుండే స్ట్రెస్ ను దూరంగా శాంతింపచేస్తుంది.

2. కొంతమంది తమ భావోద్వేగాలకు వ్యక్తపరచకుండా తమ మనసులోనే దాచుకుంటారు. ఉదాహరణకు చెప్పుకోవాలంటే.. ఎవరైనా నిత్యం అసంతృప్తికి గురిచేస్తే వారికి స్ట్రెయిట్ గా సమాధానం చెప్పడానికి భయపడుతుంటారు. అలాగే మనసులో వున్న కోరికలను, బాధను ఇతరులతో పంచుకోవడానికి ఇష్టపడరు. అలాకాకుండా.. మనసులో వున్న భావోద్వేగాలను ఎప్పటికప్పుడు ఇతరులతో పంచుకుంటే మంచిది. అలాగే ఎవరైనా నిత్యం అసహనానికి గురిచేస్తే అటువంటివారికి స్ట్రెయిట్ గా సమాధానం చెప్పేయాలి. అలా చేయకపోతే మానసిక ఒత్తిడికి లోనయి, ఎక్కువ కోపానికి గురవుతారు.

3. ఇంట్లో తల్లిదండ్రులతో లేదా భార్యాభర్తల మధ్య అప్పుడప్పుడు వివాదాలు చోటు చేసుకోవడం సహజం. ఆ సమయంలో ఎక్కువ కోపానికి గురవ్వడమే కాకుండా.. మనసులో వున్న అన్ని భావేద్వేగాలను చంపుకోవాల్సి వుంటుంది. అలా చేయడం వల్ల ఎక్కువ స్ట్రెస్ కు లోనయి అనారోగ్య పరిస్థితికి గురికావడం ఖాయం. అలాకాకుండా కోపాద్రిక్తులైన వెంటనే ఆ వాతావరణం నుంచి బయటకు వచ్చేసి వెంటనే స్నేహితులతో కలిస్తే మంచిది. వారితో గడిపిన సంతోష ఘడియలు, అల్లరి చేష్టలు వంటివి గుర్తు చేసుకుంటే.. మనసులో వుండే భావోద్వేగాలు పూర్తిగా తొలగిపోయి.. మెదడులో వుండే మొత్తం స్ట్రెస్ ఒక్కసారిగా తగ్గిపోతుంది.

4. ఎవరైనా కొంతమంది నచ్చని కొన్ని విషయాలను వెల్లడిస్తే దానికి వెంటనే కోపంగా రియాక్ట్ అవుతుంటారు. అలాగే తొందరపాటు నిర్ణయాలతో తప్పుడు పనులు చేస్తుంటారు. అలా వెంటనే రియాక్ట్ కాకుండా కొద్దిసేపటివరకు కూల్ గా ఆలోచించిన అనంతరం స్పందిస్తే మంచిది. ఒకవేళ అలా కాని పక్షంలో ఏదైనా నచ్చిన పనిని అప్పటికప్పుడు నిర్వహిస్తే కోపం తగ్గే అవకాశాలు చాలా వుంటాయి. ఎక్కువ కోపానికి గురైనప్పుడు తమ భావోద్వేగాలను ఇతరుల మీద ప్రదర్శించకుండా వాటిని ఒక డైరీలోనో లేదా సోషల్ నెట్ వర్కింగ్ బ్లాగుల్లోనే పొందుపరుచుకుంటే చాలా వరకు తగ్గే అవకాశాలు వుంటాయి.

5. అన్నిటికంటే ముఖ్యమైనది ధ్యానం.. ప్రతిరోజూ ధ్యానం చేస్తే ఇది భావోద్వేగాల విషయంలో శక్తివంతమైన పట్టు సాధించడానికి దోహదం చేస్తుంది. ధ్యానం చేయడం వల్ల మెదడు చాలా ప్రశాంతంగా వుంటుంది కాబట్టి.. వెంటనే కోపం వెల్లడవ్వదు. దీంతో మానసికంగా ఎటువంటి ఒత్తిళ్లు వుండవు. పైగా శరీరం కూడా చాలా ప్రశాంతంగా వుంటుంది. ఆరోగ్యంగా వుండటానికి సహాయపడుతుంది. కాబట్టి ప్రతిరోజూ సమయానుకూలంగా ధ్యానం చేస్తే చాలా మంచిది.