‘యాక్షన్’ ఎపిసోడ్ తో రంగంలోకి దగనున్న బన్నీ

Posted: 07/08/2015 12:50 PM IST

Allu arjun latest movie schedule starts with action episode boyapati srinu allu arvind

‘రేసుగుర్రం’ చిత్రానికిగాను ఉత్తమ నటుడిగా ఫిల్మ్ ఫేర్ అవార్డు అందుకున్న స్టైలిష్ స్టార్ అల్లు అర్జున్.. ఆ ఉత్సాహంతోనే తన తదుపరి చిత్రాన్ని ప్రారంభిస్తున్నాడు. ‘సన్నాఫ్ సత్యమూర్తి’ సినిమా తర్వాత బోయపాటి దర్శకత్వంలో బన్నీ ఓ మూవీ చేయనున్న విషయం తెలిసిందే! గతకొన్నాళ్ల నుంచి వాయిదా పడుతూ వస్తున్న ఈ ప్రాజెక్ట్ ఇటీవలే ముహూర్త కార్యక్రమాల్ని జరుపుకుంది. శరవేగంగా ప్రీప్రొడక్షన్ జరుపుకుంటున్న ఈ చిత్రం ఈనెల 19వ తేదీన సెట్స్ పైకి వెళ్లనుంది. ప్రస్తుతం అందుకు సంబంధించిన సన్నాహాలు వేగంగా జరుగుతున్నాయి.

ఇదిలావుండగా.. తాజాగా అందుతున్న సమాచారాల ప్రకారం ఈ సినిమాను ‘షూటింగ్’ ఎపిసోడ్ తో స్టార్ట్ చేయనున్నారని తెలిసింది. ‘ఇద్దరమ్మాయిలతో’ సినిమాలో ఆసక్తిని రేకెత్తించిన ఒక యాక్షన్ ఎపిసోడ్ కి, ‘కెచ్చా’ అనే థాయ్ లాండ్ కి చెందిన స్టంట్ మాస్టర్ తో ఈ ఫైట్ కంపోజ్ చేయించారు. ఇప్పుడు ఈ తాజా చిత్రానికి కూడా ఆయనే పనిచేస్తున్నాడని సమాచారం. ఆయన కంపోజ్ చేసిన యాక్షన్ సన్నివేశాలతోనే ఈ మూవీ సినిమా మొదటి షెడ్యూల్ ఆరంభమవుతుంది. ఇందుకుగాను బన్నీ కూడా బాగానే కసరత్తు చేశాడని.. ఈ ఎపిసోడ్ సినిమాలో హైలైట్ గా నిలుస్తుంది కాబట్టి దీనిపై చాలా జాగ్రత్తలు తీసుకుంటున్నట్లు తెలుస్తోంది.

స్టైలిష్ స్టార్ అయిన బన్నీ స్టైల్, కమర్షియల్-యాక్షన్ సినిమాలను తెరకెక్కించడంలో దిట్టైన దర్శకుడు బోయపాటి శ్రీను దర్శకత్వంలో వస్తున్న ఈ మూవీ అభిమానుల్లో ఆసక్తి రేపుతోంది. మొదటి షెడ్యూలే ‘యాక్షన్’ ఎపిసోడ్ తో స్టార్ అవుతుండడంతో ఈ సినిమా ఎలా వుంటుందోననే ఆసక్తి యూత్ లో పెరుగుతోంది. ఇక ఈ చిత్రంలో బన్నీ సరసన రకుల్ ప్రీత్ సింగ్ హీరోయిన్ గా నటిస్తోంది. గీతా ఆర్ట్స్ బ్యానర్ పై అల్లు అరవింద్ ఈ చిత్రాన్ని నిర్మిస్తున్నారు.