కేసీఆర్.. బంద్ ఎలా జరుపుతావ్?: జగ్గారెడ్డి

Posted: 05/01/2013 05:56 PM IST

కేసీఆర్.. ఖబడ్దార్. ఏనాడైనా తెలంగాణ ప్రజల కోసం సానుకూలంగా మాట్లాడావా? భూకంపం సృష్టిస్తానంటున్నావ్. నీ మాటలకు భూదేవికి కోపం వచ్చి నిజంగా భూకంపం వస్తే నష్టపోయేది తెలంగాణ ప్రజలే కదా? తెలంగాణ ప్రజలు నష్టపోవడమే నీకు సంతోషమా? గురువారం మెదక్ జిల్లా బంద్‌కు ఎందుకు పిలుపునిచ్చావ్. మెదక్ జిల్లాకు బయ్యారం గనులకు సంబంధం ఏమిటి? ఎలా బంద్ చేస్తావో చూస్తా. నేడు బంద్ జరగకుండా అడ్డుకుంటా'' అని టీఆర్ఎస్ అధ్యక్షుడు కె.చంద్రశేఖర్‌రావుపై ప్రభుత్వ విప్ తూర్పు జయప్రకాష్ రెడ్డి మండిపడ్డారు. సీఎల్పీ కార్యాలయంలో ఆయన మాట్లాడారు. తెలంగాణ ఆకాంక్షను కేసీఆర్, ఆయన కుటుంబం రాజకీయంగా వాడుకుంటోందని ఆగ్రహం వ్యక్తం చేశారు. సీఎం కిరణ్ బహిరంగ సభకు లక్షలాది మంది తరలి రావడాన్ని జీర్ణించుకోలేక కేసీఆర్ నోటికి వచ్చినట్లుగా మాట్లాడుతున్నారని దుయ్యబట్టారు.

అందుకే ఆయన మెదక్ జిల్లా బంద్‌కు పిలుపును ఇచ్చారని ఆరోపించారు. సీఎం కిరణ్ సభకు లక్షలాది మంది తరలి వస్తే.. కిరాయికి వచ్చారన్న కేటీఆర్ వ్యాఖ్యలపై జగ్గారెడ్డి విరుచుకుపడ్డారు. తెలంగాణ ప్రజలు కిరాయివారిగా పేర్కొన్నందుకు తక్షణమే కేటీఆర్ క్షమాపణలు చెప్పాలని డిమాండ్ చేశారు. మాజీ ముఖ్యమంత్రి వైఎస్ తప్పు చేశారని భావిస్తే ఆయన ఫొటోను సీఎల్పీ కార్యాలయంలో తొలగించడంపైనా చర్చ ప్రారంభిస్తామని జగ్గారెడ్డి చెప్పారు. తండ్రిగా కొడుకు కోసం వైఎస్ తప్పు చేయబట్టే నేడు వాటిని కిరణ్ రద్దు చేశారని అన్నారు.