Posted: 10/11/2012 01:05 PM IST

ఎట్టకేలకు జంట పోలీసు కమిషనరేట్ల పరిధిలో నెల రోజుల నుంచి వరుసగా జరుగుతున్న జ్యువెలరీ షాపు దోపిడీలకు చెక్ పడింది. ఈ దోపిడీలకు పాల్పడుతున్న ముఠాలోని ముగ్గురిని పోలీసులు అదుపులోకి తీసుకున్నారు. విచారణలో ఒడిశాకు చెందిన ఈ గ్యాంగ్ రెండు నెలల క్రితమే నగరంలో ప్రవేశించినట్టు తేలింది. పరారీలో ఉన్న మరో ఇద్దరి కోసం పోలీసులు గాలిస్తున్నారు. వరుస దోపిడీ కేసుల దర్యాప్తును ముమ్మరం చేసేందుకు నాలుగు ప్రత్యేక పోలీసు బృందాలను రంగంలోకి దింపారు. ఓ బృందం నిన్న (బుధవారం) ఒడిశాకు బయలుదేరి వెళ్లగా... మరో బృందం మహారాష్ట్రకు వెళ్లింది. మిగిలిన రెండు బృందాలు శివార్లలో గాలిస్తున్నాయి.
గతనెల 20న కేపీహెచ్‌బీ భాగ్యనగ ర్‌కాలనీలోని ప్రొద్దుటూరు వారి వాసవి జ్యువెలర్స్‌లోను, 27న జూబ్లీహిల్స్‌లోని శ్రీకృష్ణానగర్‌లో బాబూలాల్ హీరా చాంద్ జైన్ జ్యువెలరీ షాప్‌లో రూ.25 లక్షల విలువైన బంగారు ఆభరణాల చోరీ జరిగిన విషయం తెలిసిందే. ఈ రెండు దోపిడీలు జరిగిన పది రోజులకే దొంగలు ఉప్పల్‌లోని మహాలక్ష్మి నగల దుకాణంపై విరుచుకుపడ్డారు. అయితే నగల దుకాణం జయమాని హస్తమల్‌శర్మ, పోలీసుల సమయస్ఫూర్తితో దోపిడీ విఫలమైంది. ఈ మూడు సంఘటనలకు పాల్పడింది ఒకే ముఠా అని తేలింది. ముగ్గురు నిందితులు పట్టుబడటంతో కేపీహెచ్‌బీకాలనీ, జూబ్లీహిల్స్ దోపిడీల మిస్టరీ వీడినట్లయ్యింది. గ్యాస్ కట్టర్‌తో షట్టర్‌ను తొలగించి లోనికి వెళ్లి, లాకర్‌లను సైతం గ్యాస్ కట్టర్‌తో తొలగించి దోచుకోవడం వీరి నైజం.

...avnk