Salarjung Museum In Hyderabad

Posted: 12/15/2011 03:42 PM IST

దేశ విదేశీ సందర్శకులను విశేషంగా ఆకట్టుకుంటున్న సాలార్‌జంగ్ మ్యూజియం ఆరు దశాబ్దాలు పూర్తి చేసుకుంది. అరవై ఏళ్ల కాలంలో అనేక మైలురాళ్లను అధిగమించి అరుదైన కళాఖండాలతో అలరారుతోంది. దాదాపు 49వేల కళాఖండాలు, 42 గ్యాలరీలతో విస్తరించిన సాలార్‌జంగ్ మ్యూజియం 60 ఏళ్లు పూర్తి చేసుకున్న సందర్భంగా గురువారం సాయంత్రం ప్రత్యేక ఫొటో ఎగ్జిబిషన్ ఏర్పాటు చేస్తున్నారు. సాలార్‌జంగ్ మ్యూజియం పాలక మండలి సభ్యుడు నవాబ్ జాకీర్ హుస్సేన్ ఈ ఎగ్జిబిషన్ ప్రారంభిస్తారు.ఈ సందర్భంగా మొదటి సాలార్‌జంగ్ మీర్ తురబ్ అలీ ఖాన్ భవనంలో ప్రముఖ గజల్ గాయకుడు పండిట్ ఎస్.విఠల్‌రావు గజల్స్ కార్యక్రమాన్ని ఏర్పాటు చేశారు. నిజాంల వద్ద ప్రధానిగా కీలక బాధ్యతలు నిర్వర్తించిన ముగ్గురు సాలార్‌జంగ్‌లు దేశవిదేశాల నుంచి సమీకరించిన అరుదైన..అద్భుత కళాఖండాలతో సాలార్‌జంగ్‌ల అధికార నివాసం దివాన్ దేవిడీలో ఏర్పాటు చేసిన మ్యూజియంను అప్పటి ప్రధాని పండిట్ జవహర్‌లాల్ నెహ్రూ 1951 డిసెంబర్ 16న ప్రారంభించారు.పరిపాలనా కార్యకలాపాల కోసం నిర్దేశించిన దివాన్‌దేవిడీ నిర్మాణాలు మ్యూజియం సందర్శకులకు ప్రతిబంధకంగా మారడంతో కేంద్ర ప్రభుత్వం చొరవ తీసుకుని నయాపూల్ సమీపంలో మూసీ నది ఒడ్డున సుమారు 12 ఎకరాల విస్తీర్ణంలో ప్రత్యేక భవనాన్ని నిర్మించింది. ఈ నూతన భవనంలోకి తరలించిన సాలార్‌జంగ్ మ్యూజియంను 1968 జులై 24న అప్పటి భారత రాష్ట్రపతి డాక్టర్ జాకీర్ హుస్సేన్ ప్రారంభించారు. సందర్శకుల తాకిడి ఎక్కువ కావడంతో మ్యూజియం గ్యాలరీల విస్తరణ అనివార్యమైంది. దీంతో ప్రధాన భవనానికి ఇరువైపులా రెండు కొత్త భవనాలను నిర్మించారు. మీర్ తురబ్అలీ ఖాన్ (మొదటి సాలార్‌జంగ్) పేరుతో నిర్మించిన భవనాన్ని 1990లో అప్పటి రాష్ట్ర గవర్నర్ డాక్టర్ రంగరాజన్ ప్రారంభించారు. తూర్పు వైపున మీర్ లాయక్అలీ ఖాన్(రెండో సాలార్‌జంగ్) పేరుతో విస్తరించారు. ప్రపంచ ప్రఖ్యాతి గాంచిన శిల్పకళాకారుడు బెంజోనీ రూపొందించిన ముసుగురాణి వెల్డ్ రెబెకా పాలరాతి విగ్రహం, ఇంగ్లాండ్ నుంచి దిగుమతి చేసుకున్న గంటల గడియారం సాలార్‌జంగ్ మ్యూజియం సందర్శకులను విశేషంగా ఆకట్టుకుంటున్నాయి.