బోల్డ్ కామెంట్ కు మాంజిమా కూల్ ఆన్సర్

Posted: 05/11/2017 05:40 PM IST

తమపై పడే కౌంటర్లకు రియాక్షన్ ఇవ్వకపోతే ఆ హీరోయిన్ పరిస్థితి అంతే. ఈ విషయంలో బాలీవుడ్ భామలు చాలా అడ్వాన్స్ గా ఉండగా, మన హీరోయిన్లు ఇప్పుడిప్పుడే నేర్చుకుంటున్నారు. ఘాటు వ్యాఖ్యలకు సూటిగా ముఖంపై గుద్దేసినట్లు సమాధానాలిచ్చేస్తున్నారు. మల్లూ బ్యూటీ మాంజిమా మోహన్ కూడా ఇప్పుడు ఇలాంటి పనే చేసింది.

'సాహసం శ్వాసగా సాగిపో' సినిమాతో తెలుగు సినీ పరిశ్రమకు పరిచయమైన ఈ కుట్టి సోషల్ మీడియాలో సరదాగా ఓ అభిమాని చేసిన పిచ్చి కామెంట్ కు గట్టి సమాధానం చెప్పింది. సినిమాల్లో కేవలం న్యూడ్ సీన్లు.. పొట్టి బట్టల్లో ఉన్న హీరోయిన్లను చూసేందుకే జనాలు థియేటర్లకు వస్తారని ఓ వ్యక్తి పోస్ట్ చేశాడు.

దానికి కౌంటర్ ఇచ్చిన మాంజిమా ‘జనం థియేటర్లకు వచ్చేది హీరోయిన్లను నగ్నంగానో, కురచ దుస్తుల్లోనో చూడ్డానికేనని మీరు భావిస్తే అది చాలా తప్పుడు అభిప్రాయం. మంచి సినిమాలను ఆస్వాదించేందుకే ప్రజలు థియేటర్లకు వస్తారు’ అంటూ కూల్ గా సమాధానం చెప్పింది. గ్లామర్ అనేది సినిమాలో ఓ పార్టే తప్ప.. అదే సినిమాను డిసైడ్ చేస్తుందన్న అతగాడి మైండ్ సెట్ తప్పని ఒక్క మాటతో తేల్చేసింది.