దాసరి కామెంట్: మనల్ని మనమే తక్కువ చేసుకుంటున్నాం

Posted: 01/23/2017 12:44 PM IST

టాలీవుడ్ సీనియర్ దర్శకుడు దాసరి నారాయణరావు మరోసారి ఆసక్తికర వ్యాఖ్యలు చేశాడు. దాసరి నిర్మించిన అభిషేకం అనే సీరియల్ 2500 ఎపిసోడ్స్ పూర్తి చేసుకున్న సందర్భంగా ప్రముఖ వ్యాపారవేత్త టి.సుబ్బిరామిరెడ్డి లలితకళా పరిషత ఆధ్వర్యంలో యూనిట్ ను సత్కరించాడు. ఈ సందర్భంగా స్టార్ దర్శకులకు దర్శకరత్న కొత్త ఛాలెంజ్ విసిరాడు.

ఈ రోజుల్లో సీరియళ్లను నిర్మించటం, దర్శకత్వం వహించడం చిన్న విషయం కాదన్న ఆయన ఇప్పుడున్న దర్శకుల్లో ఎవరైనా ఓ వంద ఎపిసోడ్లు చేస్తే వారికి పాదాభివందనం చేస్తానంటూ వ్యాఖ్యానించాడు. అంతేకాదు మన గొప్పతనాన్ని మనమే కించపరుచుకుంటున్నామంటూ తెలిపాడు.

‘మీ అభిమాన దర్శకుడు ఎవరు’ అని ఏ తెలుగువాడినైనా అడగండి. ఏ మణిరత్నం పేరో.. బాలచందర్ పేరో చెబుతాడు. అంతేకానీ, కేవీ రెడ్డి లాంటి వాళ్లు ఉన్నారన్న విషయం వారికి గుర్తుకురాదు. పోనీ.. మీకు నచ్చిన సినిమా ఏది? అని అడగండి. ఊరూ పేరు తెలియని దర్శకుడు తీసిన ఓ ఇంగ్లీష్ సినిమా పేరు చెబుతారు. అదే పక్కనే ఉన్న కోలీవుడ్ శాండల్ వుడ్, మల్లూ వుడ్ లు అలా కాదు. ముందు మేం.. మా తరవాతే ఎవరైనా అంటారు. ఇక్కడ మనల్ని మనమే కించపరుచుకుంటున్నాం అంటూ చెప్పుకోచ్చాడు.