మెగాస్టార్ చిరంజీవి 150వ సినిమాపై కొత్త ట్విస్ట్

Posted: 11/07/2015 03:46 PM IST

చిరంజీవి 150 సినిమా ఎప్పుడు.. ఎప్పుడు అన్న దానికి సమాధానం ప్రస్తుతానికి రావడం లేదు. తెలుగు ఇండస్ట్రీలో చిరు సినిమా ఎప్పుడు అన్న ప్రశ్న మిలియన్ డాలర్ల ప్రశ్న అని అనుకునే వారు కూడా ఉన్నారు. అయితే ఇటీవల 'బ్రూస్‌లీ ద ఫైటర్‌' చిత్రంతో ప్రేక్షకుల ముందు కొచ్చారు చిరంజీవి. ఆయన నటించబోయే 150వ చిత్రం తాజాగా మరో కొత్త మలుపు తిరిగిందని సమాచారం. తొలుత పూరీజగన్నాథ్‌తో 'ఆటోజానీ' చిత్రాన్ని చేసేందుకు చిరంజీవి ఆసక్తి చూపించిన సంగతి తెలిసిందే. అయితే ఆ కథలో సెకండాఫ్ చిరంజీవికి నచ్చకపోవడంతో ఆ ప్రాజెక్ట్‌కి ఫుల్‌స్టాప్‌ పడింది. తర్వాత వి.వి. వినాయక్‌ దర్శకత్వం లో తమిళంలో ఘనవిజయం సాధించిన విజయ్‌ 'కత్తి' చిత్రాన్ని రీమేక్‌ చేస్తున్నారనే వార్తలు బాగా హల్‌చల్‌ చేశాయి.

అయితే తాజాగా ఈ వార్తకి కూడా బ్రేక్‌పడి చిరంజీవి 150వ సినిమాకి సంబంధించి సరికొత్త విషయం వెలుగులోకి వచ్చింది. రాజ్‌కుమార్‌ హిరానీ 'మున్నాభాయ్‌' సిరీస్‌లో భాగంగా మరో చిత్రాన్ని తెరకెక్కించేందుకు సన్నాహాలు చేస్తున్న సంగతి విదితమే. హిందీతో పాటు తెలుగులో కూడా ఆ చిత్రాన్ని హిరానీ చేసేందుకు సుముఖంగా ఉన్నారట. తెలుగులో చిరంజీవితో ఈ ప్రాజెక్ట్‌ ఉండొచ్చని తెలుస్తోంది. లేదా కథ మాత్రమే తీసుకుని తెలుగు దర్శకులతో ఈ సినిమాని చిరంజీవి చేసే అవకాశముందని సమాచారం.