సినిమా స్టార్ల పై గాలి వార్తలు కోకొల్లలుగా వస్తుంటాయి. కానీ అవి అప్పుడప్పుడు శ్రుతి మించుతుంటాయి. ఇప్పుడు కూడా అలా శ్రుతి మించిన వార్తలే వస్తున్నాయి టాలీవుడ్ రెబల్ స్టార్ ప్రభాస్  పై. ప్రస్తుతం ప్రభాస్ రాజమౌళి ప్రతిష్టాత్మకంగా తెరకెక్కిస్తున్న ‘బాహుబలి ’ సినిమాలో నటిస్తున్న విషయం తెలిసిందే. ఈ సినిమా షూటింగు సెట్లో  ప్రభాస్ గాయ పడ్డాడని, గాయాల కారణంగా షూటింగు నిలిపి వేశారని వార్తలు వస్తే సినిమా యూనిట్ సభ్యులు మీడియా ముందుకు వచ్చి అలాంటిదేమీ లేదని, వార్తలు అని నిరాధారమైనవేనని చెప్పారు.

ఆ వార్తలు పూర్తిగా సమసిపోక ముందే మరో రూమర్ ప్రభాస్ పై ఫిలిం నగర్లో చెక్కర్లు కొడుతుంది. ప్రస్తుతం రామోజీ ఫిలిం సిటీలో చిత్రీకరిస్తున్న భారీ యుద్ద సన్నివేశాల్లో భాగంగా గుర్రపు స్వారీ చేస్తూ ప్రభాస్ కింద పడి పోయాడని, అతని తలకు బలమైన గాయం అయ్యిందని, ప్రస్తుతం అతను కోమాలో ఉన్నాడనే వార్త ప్రచారంలోకి వచ్చే సరికి అతని అభిమానులు ఒక్కసారి షాక్ తిన్నారు. విషయం తెలుసుకున్న పలువురు ఆరా తీస్తే... ఈ వార్తలన్నీ పుకార్లేనని, ప్రభాస్ నిశ్చింతగా షూటింగులో పాల్గొంటున్నాడని, ఆయనకు ఎలాంటి గాయాలు కాలేదని తేలింది.

పుకార్లు రావడం సహజమే కానీ, ఇంత శ్రుతి మించి గాలి వార్తలు స్రుష్టించడం తగదంటున్నారు. సినిమా వివరాల్లోకి వెళితే...ప్రభాస్, అనుష్క, రాణా, తమన్నా ప్రధాన పాత్రల్లో రాజమౌళి దర్శకత్వంలో తెరకెక్కుతున్న ఈ భారీ బడ్జెట్‌ చిత్రం  ఆర్కా మీడియా వర్క్స్‌ పతాకంపై శోభు యార్లగడ్డ, ప్రసాద్‌ దేవినేని నిర్మిస్తున్నారు.