Posted: 05/18/2012 11:25 AM IST

భారతీయ స్టాక్ మార్కెట్లు లాభాలతో ముగియడం, ఎగమతిదారులు పై స్థాయిలో డాలర్లను భారీగా విక్రయించడం కూడా డాలరు పతనాన్ని అడ్డుకోవడంలో కొంతమేరకు తోడ్పడ్డాయి. ఫారెక్స్ మార్కెట్లో రూపాయి డాలరుకు 54 రూపాయల నలభై పైసల వద్ద ఆశావహంగానే ప్రారంభమైంది. డాలరుతో రూపాయి విలువ రోజురోజుకు దిగజారిపోతోంది. బుధవారం రికార్డు స్థాయిలో డాలరుకు 54.50 రూపాయల స్థాయికి పడిపోయిన రూపాయి మరింత పడిపోయి ఒక దశలో 54 రూపాయల 60 పైసల స్థాయికి చేరుకుంది. అయితే రిజర్వ్ బ్యాంక్ జోక్యం చేసుకోవడంతో చివరికి 54 రూపాయల 47 పైసల వద్ద స్థిరపడింది. అయితే డాలర్‌కు భారీ డిమాండ్ కారణంగా స్టాక్ మార్కెట్లు పతనం కావడంతో రూపాయి కూడా పతనమైంది. అంతర్జాతీయ మార్కెట్లో ముడిచమురు ధరలు ఆరునెలల కనిష్టస్థాయి (బ్యారెల్ 93 డాలర్లు)కి పడిపోవడంవల్ల కూడా డాలర్లకు డిమాండ్ ఒక్కసారిగా పెరిగిపోయింది. అయితే ఈ దశలో రిజర్వ్ బ్యాంక్ జోక్యం చేసుకుని కొన్ని డాలర్లను విక్రయించడం రూపాయి నిలదొక్కుకోవడానికి కారణమైందని మార్కెట్ వర్గాలు తెలిపాయి. అయితే యూరోజోన్ సంక్షోభం ఒక కొలిక్కి వచ్చి డాలరుతో యూరో కరెన్సీ బలపడితే తప్ప రూపాయి మళ్లీ పుంజుకోవడం కష్టమేనని ఆ వర్గాలు అంటున్నాయి.