జుట్టు సమస్యలకు చెక్ పెట్టే ఎగ్ హెయిర్ ప్యాక్

Posted: 07/09/2015 11:33 AM IST

పోషకాహారలోపం, వాతావరణ పరిస్థితుల మార్పుల ప్రభావంతో రకరకాల జుట్టు సమస్యలు తలెత్తుతాయి. రాలిపోవడం, పొడిబారిపోవడం, తెల్లగా మారడం.. ఇంకా రకరకాల ప్రాబ్లమ్స్ ని ఎదుర్కోవాల్సి వస్తుంది. ఈ విధంగా వచ్చే వివిధరకాల జుట్టు సమస్యలకు చెక్ పెట్టడంలో గుడ్డు సమర్థవంతంగా పనిచేస్తుంది. జుట్టుకు కావలసిన ప్రోటీన్లు, విటమిన్లు, మినరల్స్, కొవ్వు ఆమ్లా, యాంటీ ఆక్సిడెంట్లు గుడ్డులో పుష్కలంగా వుంటాయి కాబట్టి.. జుట్టు సంరక్షణకు గుడ్డు ఎంతో శ్రేయస్కరం. గుడ్డుతో వివిధరకాల రెమెడీలు తయారుచేసుకుని జుట్టుకు పట్టిస్తే.. ఎన్నో ప్రయోజనాలు పొందవచ్చు. అవేమిటో తెలుసుకుందాం...

* ఒక పాత్ర తీసుకుని అందులో ఒక గుడ్డు తెల్ల సోన వేయాలి. అనంతరం దాంట్లో ఒక స్పూన్ ఆలివ్ నూనె వేసి బాగా కలుపుకోవాలి. ఈ మిశ్రమాన్ని మొత్తం జుట్టుకు పట్టించి.. 15-20 నిమిషాల తర్వాత చల్లని నీరు, ఒక తేలికపాటి షాంపూతో శుభ్రం చేయాలి. ఇలా వారానికి మూడుసార్లు చేస్తే.. జుట్టు పెరుగుదల మరింతగా పెరుగుతుంది.

* ఒక గిన్నెలో ఒక గుడ్డు పచ్చసొన తీసుకోని.. అందులో ఒక కప్పు పెరుగు వేసి బాగా కలపాలి. ఈ మిశ్రమాన్ని జుట్టుకు బాగా పట్టించి, కాసేపు మర్దన చేయాలి. 20 నిమిషాల పాటు అలాగే వుంచుకోవాలి. అనంతరం చల్లని నీటితో శుభ్రం చేసుకుని.. స్నానం చేయాలి. ఇలా రెగ్యులర్ గా చేసుకుంటే.. జుట్టు సిల్కీగా తయారవుతుంది.

* ఒక గిన్నెలో గుడ్డు పచ్చసొన తీసుకోని అందులో ఒక స్పూన్ ఆలివ్ నూనె వేసి బాగా కలుపుకోవాలి. ఈ మిశ్రమంలో కొద్దిగా గోరువెచ్చని నీరు జోడించాలి. జుట్టును వాష్ చేసుకున్న తరువాత జుట్టు పొడవుకు వ్యతిరేకంగా, అడుగున ఈ కండీషనర్ ను పట్టించాలి. కొంత సమయం తర్వాత జుట్టును శుభ్రం చేయాలి.

* ఒక గిన్నెలో ఒక కోడిగుడ్డు పచ్చసొన తీసుకుని.. అందులో స్పూన్ తేనే, ఒక స్పూన్ పెరుగు, అర స్పూన్ కొబ్బరి నూనె వేసి బాగా కలుపుకోవాలి. ఈ మిశ్రమాన్ని జుట్టుకు బాగా పట్టించి రెండు గంటల తర్వాత శుభ్రం చేయాలి. ఇలా వారానికి ఓసారి చేసుకుంటే.. పొడిబారిన జుట్టు తిరిగి మృదువుగా మారుతుంది.