మీరు బరువు తగ్గండిలా ?

Posted: 07/12/2013 06:49 PM IST

బరువు తగ్గేందుకు ఎన్ని కొత్త మార్గాలనైనా అన్వేషించవచ్చు. వయసు పెరిగే కొద్దీ అధిక బరువు రకరకాల సమస్యలను తెచ్చిపెడుతుంది. బరువును తగ్గించుకోవడానికి ఇదివరకే బోలెడన్ని పరిశోధనలు వచ్చాయి. ఆ జాబితాలోనే మరొక కొత్త పరిశోధన చేరింది. బరువు తగ్గాలంటే మనం తినేతిండిలో కోడిగుడ్డు, బీన్స్, ఫ్రూట్‌సలాడ్, గ్రీన్ టీ ఉండేలా చూసుకోవాలంటున్నారు పరిశోధకులు. రోజు మార్చి రోజు ఎగ్‌వైట్ తీసుకుంటే అధిక ప్రొటీన్లు లభిస్తాయి. అవి సాయంత్రం వరకు శరీరానికి కావాల్సిన శక్తిని సమకూరుస్తాయట. రక్తంలో చక్కెరస్థాయిలను పెరగకుండా నియంత్రించడం మరో ప్రయోజనం. ఉదయాన్నే అల్పాహార సమయంలో ఒక గుడ్డును తీసుకుంటే మరీ మంచిది.

అత్యధిక పీచుపదార్థం కలిగిన బీన్స్‌ను మెనూలో ఉండేలా చూసుకోవాలి. ఉడికించిన బీన్స్‌ను తినడం వల్ల శరీరానికి తగినంత పీచుపదార్థం లభిస్తుంది. తద్వార జీర్ణవ్యవస్థ మెరుగుపడుతుంది అంటున్నారు పరిశోధకులు.

ఇక, భోజనానికి ముందుకాని ఆ తర్వాత కాని ఫ్రూట్‌సలాడ్ తీసుకుంటే.. తక్కువ రైస్‌తోనే కడుపునిండా భోంచేశామన్న సంతృప్తి కలుగుతుంది. తిన్న ఆహారం తేలిగ్గా జీర్ణమవ్వడంతోపాటు విటమిన్ 'సి', 'ఇ', పోలిక్ యాసిడ్ లభిస్తాయి. సాధారణ కాఫీ, టీలు తాగేబదులు 'గ్రీన్ టీ' తాగడం ఉత్తమం. ఇందులోని యాంటీ ఆక్సిడెంట్స్ శరీరంలోని కొవ్వును త్వరగా కరిగిస్తాయి. బరువు పెరగకుండా చూస్తాయి.