గాలి పెళ్లికి సెలబ్రిటీల గోల

Posted: 10/20/2016 05:23 PM IST

పెళ్లి కార్డుతోనే పెద్ద సంచనలం రేపి అందరి దృష్టిని ఆకర్షించాడు కర్ణాటక మాజీ మంత్రి, మైనింగ్ రారాజు గాలి జనార్దన్ రెడ్డి. ఇప్పుడు ఆ పెళ్లికి సెలబ్రిటీల కళతో సందడి చేసేందుకు సిద్ధమౌతున్నాడు. ఒక చిన్న ఎల్సీడీ స్క్రీన్ కార్డులో ఉంచి వీడియో మెసేజ్ ద్వారా పెళ్లికి రావాలంటూ అందరికీ ఆహ్వానం పంపాడు. ఇందుకోసం భారీగానే వెచ్చించినట్లు ఆ కార్డు చూస్తే అర్థమైపోతుంది. ఇంతకీ ఆ ఆలోచన ఉంది ఎవరనుకుంటున్నారు. మన డైలాగ్ కింగ్ సాయికుమార్. తెలుగుతోపాటు కన్నడలోనూ స్టార్ స్టేటస్ ఉన్న సాయికుమార్ కి, గాలి కుటుంబంతో ఎప్పటి నుంచో మంచి సంబంధాలు ఉన్నాయి. ఆ చొరవతోనే కార్డు బాధ్యతలను గాలి సాయికి అప్పగించాడంట.

ఐదు రోజులపాటు దగ్గరుండి మరీ సినిమా టెక్నీషియన్స్ తో సాయి కుమార్ ఆ కార్డు డిజైన్ చేయించినట్లు తెలుస్తోంది. ఇక గాలి వారింట జరిగే ఈ పెళ్లికి పెద్ద ఎత్తున్న ఏర్పాటు జరిగిపోతున్నాయి. ఇప్పటికే బాలీవుడ్, టాలీవుడ్ లతోసహా ఆల్ వుడ్లకు సంబంధించిన సెలబ్రిటీలకు కార్డుల పంపిణీ జరిగిపోవటం, వారు పెళ్లికి హాజరయ్యేందుకు సిద్ధం కూడా అయిపోతున్నారంట.

టాలీవుడ్ నుంచి మహేష్ బాబు, ప్రభాస్, ఎన్టీఆర్, బాలీవుడ్ నుంచి షారూఖ్ ఖాన్ లతోపాటు పలువురు టాప్ డైరక్టర్లు, రాజకీయ ప్రముఖులకు కూడా ఆహ్వానం పంపిచేశాండట. అంతేకాదు వివిధ రాష్ట్రాల నుంచి వచ్చే ప్రముఖుల కోసం ప్రత్యేక రైళ్లను కూడా బుక్ చేసినట్లు సమాచారం. కావేరి వివాదంతో కోలీవుడ్ నటులకు కార్డులు అందజేయటంపై కాస్త తటాపటాయిస్తున్నట్లు తెలుస్తోంది. చూస్తుంటే కోట్లు కుమ్మరించి గాలి వారి వివాహం ఘనంగా జరగబోతుందని అర్థమౌతోంది.