మోడీ కంటే ఫడ్నవీస్ బెటర్ : అన్నా

Posted: 05/12/2015 08:20 PM IST

ప్రముఖ సామాజిక కార్యకర్త అన్నాహజారే తాజాగా మరోసారి ప్రధాని నరేంద్రమోడీ మీద నిప్పులు చెరుగుతూ.. మహారాష్ట్ర సీఎం దేవేంద్ర ఫడ్నవీస్ మీద ప్రశంసలు కురిపించారు. ప్రధాని నరేంద్ర మోదీ కంటే ఫడ్నవీస్ చాలా బాగా పనిచేస్తున్నారని ఆయన కితాబిచ్చారు. కేంద్ర ప్రభుత్వం కంటే మహారాష్ట్ర సర్కారు మంచి పనులు చేస్తోందని, అలాగే కొనసాగితే త్వరలోనే మహారాష్ట్ర రాష్ట్రం దేశంలో అత్యున్నత స్థానానికి ఎదుగుతుందని ఆయన పేర్కొన్నారు.

మహారాష్ట్రలో నీటి సంరక్షణ, పనిచేయని అధికారులకు జరిమానాలు విధించడం వంటి మంచిపనులు చేపట్టారని ఫడ్నవీస్ ను మెచ్చుకున్నారు. అయితే.. తాను రాజకీయ పార్టీలకు అనుకూలంగా మాట్లాడడం లేదని స్పష్టం చేశారు. ఇదిలావుండగా.. మోదీ సర్కారు తెచ్చిన భూసేకరణ బిల్లును హజారే తీవ్రంగా వ్యతిరేకిస్తున్నారు. ఎన్టీఏ ప్రతిపాదించిన ఈ బిల్లులో రైతు వ్యతిరేక అంశాలు తొలగించాలని.. లేకపోతే మరోసారి దీక్షకు దిగుతానని ఆయన హెచ్చరించారు.

ఈ క్రమంలోనే మోడీ మీద హజారే నిప్పులు చెరుగుతూ.. ‘మోడీ రైతుల కంటే కార్పొరేట్లకే ఎక్కువ ప్రాధాన్యం ఇస్తున్నారు’ అని ఆరోపించారు. రైతులను రక్షించే విధంగా బిల్లులో ప్రభుత్వం మార్పులు చేయకుంటే దేశవ్యాప్తంగా ‘జైల్ భరో’ ఉద్యమం చేబడతానని స్పష్టం చేశారు. రెండో ప్రత్యామ్నాయంగా 2011లో తాను చేసిన నిరాహార దీక్షను మరోసారి చేస్తానని హజారే పేర్కొన్నారు.