దావూద్ అరెస్ట్ ఖాయం : రాజ్ నాథ్

Posted: 08/12/2014 06:29 PM IST

(Image source from: central minister rajnath singh comments on dawood ibrahim)

మన భారతదేశానికి సంబంధించి మోస్ట్ వాంటెడ్ క్రిమినల్స్ ఎందరో వున్నారు. అందులో ముఖ్యంగా మొదటిపేరు వినిపించేది దావూద్ ఇబ్రహీం. ఇతను ముంబయిలో ఎన్నో మారణకాండలను సృష్టించి ఎందరో అమాయకులను బలితీసుకున్న బతికున్న నరరూప రాక్షసుడు! పసిపిల్లల నుంచి వృద్ధులవరకు ఎవరినీ వదలకుండా ఎందరో మరణాలకు కారణమైన ఏకైక క్రిమినల్ ఈ దావూద్ ఇబ్రహీం. ముఖ్యంగా 1993లో జరిగిన ముంబై వరుస పేలుళ్ల కేసులో ఇతను ప్రధాని నిందితుడు.

దావూద్ ను పట్టుకోవడానికి మన భారత ప్రభుత్వాలు ఎన్ని ప్రయత్నాలు చేసినా.. ఫలితం లేకపోయింది. ఇతను ఎక్కడున్నాడో కూడా పక్కా ఆచూకీ ఎవరికీ తెలియదు. కానీ కొన్ని వార్తాకథనాల ప్రకారం.. దావూద్ పాకిస్తాన్ లో తలదాచుకున్నట్లు తెలుస్తోంది. ఇప్పుడు ఈ మోస్ట్ వాంటెడ్ క్రిమినల్ ను పట్టుకోవడానికి ఎన్డీయే ప్రభుత్వం తీవ్రంగా శ్రమిస్తోందని కేంద్ర హోంశాఖ మంత్రి రాజ్ నాథ్ సింగ్ అంటున్నారు. ఈ నేపథ్యంలోనే ఆయన మాట్లాడుతూ...

* అంతర్జాతీయ నేరస్తుడు అయిన దావూద్ ఇబ్రహీంను పట్టుకోవడానికి తమ ప్రభుత్వం అన్ని విధాలుగా కృషి చేస్తోందని రాజ్ నాథ్ సింగ్ పేర్కొన్నారు.

* ప్రస్తుతం దావూద్ కోసం గాలింపు చర్యలను వేగవంత చేశామని.. పాకిస్తాన్ లో ఎక్కడో అతను తలదాచుకున్నాడని.. త్వరలోనే అతనిని అరెస్ట్ చేయడం ఖాయమని ఆయన తెలిపారు.

* గత ప్రభుత్వాలు కూడా దావూద్ ను పట్టుకోవడానికి తీవ్రంగా శ్రమించినప్పటికీ ఫలితం లేకపోయిందని... ఇప్పుడు తమ ప్రభుత్వం కూడా అదేవిధంగా ప్రయత్నంలో వుందని స్పష్టం చేశారు.

* దావూద్ లాంటి మోస్ట్ వాంటెడ్ క్రిమినల్స్ ప్రపంచంలో బతికే అర్హత లేదని.. భారత ప్రభుత్వం అటువంటి నేరగాళ్లను ఎట్టి పరిస్థితుల్లోనూ క్షమించబోదని ఆయన వెల్లడించారు.