Posted: 03/12/2013 05:54 PM IST

ఇనుము విరగనేని యిరుమారు ముమ్మారు
కాచి అతకవచ్చు గ్రమముగాను
మనసు విరిగెనేని మరి చేర్చరాదయా
విశ్వదాభిరామ వినురవేమ

ఇనప ముక్క ఎన్నిసార్లు విరిగినా దాన్ని మళ్ళీ అతికించ వచ్చుకానీ మనసు విరిగిపోతే దాన్ని అతకటం కష్టం అంటారు వేమనాచార్యులవారు.

ఒక సారి మాట్లాడిన తర్వాత ఆ మాటలను మళ్ళీ వెనక్కి తీసుకోవటమనేది జరగనిపని.  అందువలన ఎవరినీ నొప్పించకుండా మాట్లాడాలి.  ఈ కాలంలో, మీ మాటలను వెనక్కి తీసుకోండి అనటం జరుగుతోంది ముఖ్యంగా రాజకీయాల్లో.  అది ఎలా సంభవం.  

అలాగే, మాటల్లోనే కాకుండా ఒక సారి ఒక పని చేసి ఎవరి మనసునైనా గాయపరిస్తే మళ్ళీ ఏం చేసినా దానికి విరుగుడు అవదు.  మనసు చాలా సున్నితమైనది.  శరీరం మీది గాయం తగ్గిపోతుంది కానీ మనసు మీద పడింది తగ్గదు.  అందుకే శారీరకంగా హింసించేదానికంటే మానసికంగా హింసించేవారు ఎక్కువ క్రూరులు అని చెప్తారు.  మనసు మీద పడ్డ గాయం పైకి కనపడదు కానీ లోపల చాలా లోతుగా పడుతుంది.  అందువలన ఎవరి మనసునీ బాధపెట్టగూడదని వేమన చెప్తున్నారు.  

-శ్రీజ