Governor Narasimhan

Posted: 07/19/2012 04:46 PM IST

Governor Narasimhan

రాజసం ఉట్టిపడే ఠీవితో ఉండే రెండు రాతి సింహా లు త్వరలో రాజ్‌భవన్‌లో కొలువుదీరనున్నాయి. తిరుపతిలోని టీటీడీ శిల్పకళా ఉత్పత్తి విభాగం వీటి ని తయారు చేస్తున్నది. తన పేరు నర'సింహన్' అనో, మూడు సింహాల బొమ్మ ఉండే క్యాప్‌ను సగర్వంగా ధరించే పోలీస్ శాఖ లో తాను ఉన్నతాధికారిగా సేవలు అందించానన్న కారణంగానో సింహాల ప్రతిమలు అంటే నరసింహన్‌కు చాలా ఇష్టం. ఆయన గవర్నర్ పదవి చేపట్టగానే ప్లాస్టర్ ఆఫ్ పారిస్ తో తయారు చేయించిన రెండు సింహల విగ్రహాలను రాజ్‌భవన్ ముందు పెట్టించారు.

ఐదేళ్ల కిందట ఏర్పాటు చేసిన ఆ విగ్రహాలు దెబ్బతినడంతో వాటి స్థానంలో కలకాలం నిలిచే రాతి సింహాలను తయారు చేయించాలని భావించారు. ఈ బాధ్యతను తన కార్యదర్శి రమేశ్‌కుమార్‌కు అప్పగించారు. ఆయన ఈ పనిని వెంటనే టీటీడీ శిల్పకళా ఉత్పత్తి విభాగానికి అప్పగించారు. గవర్నర్ కోరడం, టీటీడీ ఉన్నతాధికారులు ఓకే చెప్పడంతో విగ్రహాల తయారీ కోసం తమిళనాడులోని కాంచీపురం నుంచి నల్లని గ్రానైట్ రాయి తెప్పించారు. శిల్పకళాశాల పూర్వ విద్యార్థి మురుగన్‌కు విగ్రహాలు చెక్కే బాధ్యత అప్పగించారు. ఆయన సుమారు 9 నెలలు శ్రమించి ఒక్కొక్కటి 3 టన్నుల బరువు ఉండే రెండు సింహాలను సిద్ధం చేశారు. ప్రస్తుతం వీటికి తుది మెరుగులు దిద్దుతున్నారు.