Posted: 05/23/2012 10:44 AM IST

ధరల పెంపు తప్పనిసరని, అయితే ధరలు పెంచడానికి ముందు అన్ని రాజకీయ పార్టీలతోను చర్చించాల్సి ఉందని తుర్క్‌మనిస్థాన్- అఫ్గానిస్థాన్- పాకిస్తాన్- భారత్ పైప్‌లైన్ ఒప్పందంపై సంతకాలు చేయడానికి అస్గాబాత్ వెళ్తూ కొద్దిసేపు ఇక్కడ ఆగినప్పుడు మీడియాతో మాట్లాడుతూ చెప్పారు. పెట్రోల్ ధరలపై ప్రభుత్వ నియంత్రణను 2010 జూన్‌లోనే ఎత్తివేసిన విషయం తెలిసిందే. డాలరుతో రూపాయి విలువ ఎన్నడూ లేనంత కనిష్టస్థాయికి పడిపోయిన దృష్ట్యా చమురు దిగుమతుల బిల్లు భారం పెరిగిపోనుందని కేంద్ర పెట్రోలియం శాఖ మంత్రి ఎస్ జైపాల్‌రెడ్డి అన్నారు. ఈ పరిస్థితుల్లో పెట్రోలియం ఉత్పత్తుల ధరలను వెంటనే పెంచాల్సిన అవసరం ఉందన్నారు. అయితే ధరల పెంపు ఎప్పుడు జరగనుందో మాత్రం చెప్పడానికి ఆయన నిరాకరించారు. అయితే గత ఏడాది నవంబర్ 4న చివరగా పెట్రోలు ధరలను పెంచారు.

అప్పటినుంచి ఇప్పటిదాకా చమురు ధరలు 14 శాతం పెరిగినప్పటికీ, డాలరుతో రూపాయి విలువ 7 శాతం తగ్గినప్పటికీ పెట్రోలు ధరలను పెంచలేదు. కాగా, డీజిలు, కిరోసిన్, వంటగ్యాస్ ధరలను గత ఏడాది జూన్‌లో పెంచిన విషయం తెలిసిందే. ‘అమెరికా డాలరుతో రూపాయి ఒక రూపాయి మేర తగ్గితే చమురు కంపెనీలు ఏటా 8వేల కోట్ల రూపాయలు నష్టపోతాయి. రూపాయి సోమవారం 55 రూపాయల ఆల్‌టైమ్ కనిష్టస్థాయికి పడిపోయింది. అంటే ఈలెక్కన రూపాయి విలువ తగ్గిన కారణంగా చమురు కంపెనీలు ఈ ఏడాది 72 వేల కోట్ల రూపాయలు నష్టపోనున్నాయి’ అని జైపాల్ రెడ్డి అన్నారు. ‘ఇదంతా చూసిన తర్వాత ఏదోఒకటి చేయాల్సిన అవసరం ఉంది. అయితే ఎలా చేస్తారు, ఎప్పటిలోగా చేస్తారనేది నేను ముందుగా ఊహించి చెప్పలేను’ అని జైపాల్ అన్నారు. అంతేకాదు పెట్రోలు ధరలు పెంచాలని కానీ, లేదా పెంచకూడదని కానీ ఎలాంటి నిర్ణయమూ తీసుకోలేదని ఆయన స్పష్టం చేశారు.