ఆక్స్ ఫర్డ్ కరోనా వాక్సీన్ తొలిదశ విజయవంతం.. సురక్షితం

Posted: 07/21/2020 12:11 AM IST

Who on oxford vaccine trials results are positive but a long way to go

కరోనా మహమ్మారి నియంత్రణకు ఆక్స్ ఫర్డ్ యూనివర్సిటీ ఉత్పత్తి చేస్తున్న వ్యాక్సిన్ పై ఎక్కువ మంది నమ్మకం పెట్టుకున్నారు. ఇలాంటి తరుణంలో ఆ ఆశలను నిజం చేస్తూ.. ఆక్స్ ఫర్డ్ యూనివర్సిటీ కీలక ప్రకటన చేసింది. తాము ఉత్పత్తి చేసిన ఆస్ట్రాజెనికా టీకా కరోనా వైరస్‌తో సమర్థంగా పోరాడగలదని ప్రకటించింది. అంతేకాకుండా తమ టీకా చాలా సురక్షితమని వెల్లడించింది. అందరూ ఊహించినట్లే సోమవారం (జులై 20) కరోనా వ్యాక్సిన్ అధ్యయన ప్రాథమిక ఫలితాలను ఆక్స్‌ఫర్డ్ ప్రకటించింది. తమ వ్యాక్సిన్ వైరస్‌ను బాగా తట్టుకోగలదని ఆక్స్‌ఫర్డ్ తెలిపింది. వ్యాధి నిరోధక శక్తి ఎక్కువగా ఉన్నట్లు వివరించింది.

ఈ మేరకు మెడికల్ జర్నల్ ‘ది లాన్సెట్’లో ఫేజ్ 1, 2 క్లినికల్ ట్రయల్స్‌కు సంబంధించిన ఫలితాలను ప్రకటించింది. మరిన్ని ఫలితాల కోసం చివరి దశగా వృద్ధులపై ప్రయోగాలు చేయనున్నట్లు తెలిపింది. ఈ ఏడాది చివరి వరకు ప్రయోగాల పూర్తి ఫలితాలు వస్తాయని ఆక్స్‌ఫర్డ్ పేర్కొంది. మానవులపై పరీక్షల అనంతరం తమ టీకా కరోనా వైరస్‌కు వ్యతిరేకంగా డబుల్‌ ప్రొటెక్షన్‌ ఇవ్వగలదని ఆక్స్‌ఫర్డ్‌ పరిశోధకుల బృందం చెప్పినట్లు యూకే మీడియా ఇప్పటికే ప్రకటించిన సంగతి తెలిసిందే.

ఆక్స్‌ఫర్డ్ వ్యాక్సిన్‌కు సంబంధించి మెడికల్‌ జర్నల్‌ ‘ది లాన్సెట్‌’ ఎడిటర్‌ ముందే సంకేతం ఇచ్చారు. ఆయన చేసిన ట్వీట్‌ వైరల్‌గా మారింది. వ్యాక్సిన్‌ రేసులో ముందున్న ఆక్స్‌ఫర్డ్‌ టీకా అధ్యయన ఫలితాలను ప్రకటించబోతున్నట్లు ఆయన తెలిపారు. దీంతో వైద్యరంగంతో పాటు సామాన్యుల్లోనూ ఆ ఫలితాలపై ఆసక్తి నెలకొంది. ‘రేపు.. వ్యాక్సిన్‌.. జస్ట్‌ సేయింగ్‌’ అంటూ లాన్సెట్‌ జర్నల్‌ ఎడిటర్‌ రిచర్డ్‌ హార్టన్‌ ఆదివారం ట్వీట్‌ చేశారు. దీంతో జులై 20 నాటి సంచికలో ఆక్స్‌ఫర్డ్‌ ఆస్ట్రాజెనెకా కొవిడ్‌-19 వ్యాక్సిన్‌ ఫేజ్‌-I క్లినికల్‌ ట్రయల్స్‌ డేటాను ఆ జర్నల్‌ ప్రచురిస్తారని అందరూ భావించారు.

ఆక్స్ ఫర్డ్ తో సీరమ్ ఒప్పందం..

భారత్ కు చెందిన సీరమ్‌ ఇనిస్టిట్యూట్‌ ఆఫ్‌ ఇండియా.. ఆస్ట్రాజెనెకా ఆక్స్‌ ఫర్డ్‌ వ్యాక్సిన్‌ అభివృద్ధికి సంబంధించి ఒప్పందం చేసుకుంది. వచ్చే నెలలో దేశంలోనూ క్లినికల్ ట్రయల్స్ ప్రారంభిస్తామని తెలిపింది. మరోవైపు.. కరోనా వ్యాక్సిన్‌పై ప్రపంచవ్యాప్తంగా సుమారు 140 పైగా పరిశోధనలు చేస్తుండగా.. వీటిలో 20 పైగా పరిశోధనలు ముందు వరుసలో ఉన్నాయి. హ్యూమన్ క్లినికల్ ట్రయల్స్ తొలి దశలోనూ విజయాన్ని అందుకుని ఆశలు రేపుతున్నాయి. తాము అభివృద్ధి చేసిన వ్యాక్సిన్ వచ్చే నెలలో ప్రజలకు అందుబాటులోకి వస్తుందని రష్యా ప్రకటించింది.

వ్యాక్సిన్ పై ప్రయోగాలు విజయవంతం కావడంతో ఉత్పత్తికి సంబంధించిన చర్యలు వేగవంతం చేసినట్లు వెల్లడించింది. ఇటు భారత్లోనూ కరోనా వ్యాక్సిన్ పరిశోధనలు కీలక దశకు చేరుకున్నాయి. భారత్ బయోటెక్ రూపొందిస్తున్న కోవ్యాగ్జిన్ కూడా ఇవాళ నిమ్స్ తో పాటుగా ఢిల్లీలోని ఎయిమ్స్ లోనూ హ్యూమన్ క్లినికల్ ట్రయల్స్ తొలిదశను ప్రారంభించాయి. హైదరాబాద్ లోని ప్రతిష్టాత్మక నిమ్స్ ఆస్పత్రిలో ఇద్దరు వాలంటీర్లపై సోమవారం ఈ వ్యాక్సిన్‌ను ప్రయోగించారు. అటు ఢిల్లీ ఎయిమ్స్‌లోనూ కరోనా వ్యాక్సిన్‌పై క్లినికల్ ట్రయల్స్ ప్రారంభమయ్యాయి. నిమ్స్ లో వాక్సీన్ తీసుకున్న ఇద్దరు వాలెంటీర్లు సురక్షితంగా వున్నారని వైద్యవర్గాలు వెల్లడించాయి.