పోలీసుల అదుపులో టీవీ9 మాజీ సీఈవో రవిప్రకాష్

Posted: 10/05/2019 01:22 PM IST

టీవీ9 ఛానెల్ మాజీ సీఈవో రవి ప్రకాశ్ మరోమారు బంజారాహిల్స్ పోలీసులు తమ అదుపులోకి తీసుకున్నారు. రవిప్రకాష్ ను ఆయన నివాసంలో అదుపులోకి తీసుకున్న పోలీసులు బంజారాహిల్స్‌ ఏసీపీ కార్యాలయానికి తరలించి అక్కడ అతడ్ని విచారిస్తున్నారు. గతంలో ఆయన టీవీ9 సీఈఓగా వ్యవహరించిన సమయంలో పోలీసు విధులకు ఆటంకం కలిగించిన కేసులో అయన్ను అదుపులోకి తీసుకున్నట్లు సమాచారం. దీంతోపాటు ఆయనపై నిధులు దుర్వినియోగం కేసులు కూడా నమోదైనట్లు సమాచారం.

ఏబీసీఎల్‌ కంపెనీ నుంచి రూ.12 కోట్ల నగదును రవిప్రకాశ్‌ అక్రమంగా వాడుకున్నారంటూ టీవీ9 ప్రస్తుత సీఈవో గొట్టిపాటి సింగారావు ఫిర్యాదు చేశారు. నిధుల దారిమళ్లించిన రవిప్రకాశ్‌ అండ్‌ కోపై క్రిమినల్‌ కేసు పెట్టి చర్యలు తీసుకోవాలని అలందా మీడియా నిర్ణయించడంతో సింగారావు ఈ మేరకు పోలీసులకు పిర్యాదు చేశారు. సంస్థ నిధులను భారీగా పక్కదోవ పట్టించారనే ఫిర్యాదుతో రవిప్రకాశ్‌తో పాటు ఏబీసీఎల్‌ మాజీ సీఎఫ్‌వో ఎంకేవీఎన్‌ మూర్తిపై బంజరాహిల్స్‌ పోలీసులు 409, 418, 420 సెక్షన్ల కింద కేసు నమోదు చేశారు.

మూడు విడతల్లో రూ.6కోట్ల 36 లక్షలు విత్‌ డ్రా చేశారు. అలాగే  డైరెక్టర్‌గా వ్యవహరించిన ఎంకేవీఎన్‌ మూర్తిపైనా నిధుల విత్‌డ్రా కేసు నమోదైంది. ఆయన రూ.5కోట్ల 97 లక్షలు విత్‌డ్రా చేయగా, మరో డైరెక్టర్‌ క్లిఫోర్డ్‌ పెరారీపైనా నిధుల విత్‌డ్రా కేసు నమోదు చేశారు పోలీసులు. పెరారీ రూ.5కోట్ల 97 లక్షలు విత్‌డ్రా చేసినట్లు సమాచారం. అలందా షేర్‌ హోల్డర్లు, డైరెక్టర్లకు సమాచారం ఇవ్వకుండా రవిప్రకాశ్‌ బృందం...భారీ మొత్తంలో కంపెనీ నగదును విత్‌ డ్రా చేసినట్లు తెలుస్తోంది.