రజనీ పార్టీపై సాయంత్రమే క్లారిటీ?

Posted: 05/19/2017 10:31 AM IST

రాజకీయాలపై దేవుడు శాసిస్తే అంటూ.. కాస్త కన్ఫ్యూజ్ అర్థం కానీ రీతిలో ప్రకటన చేసిన సూపర్ స్టార్ రజనీ కాంత్ తిరుచ్చి, అర్యలూరు, తిరంబళూరు ప్రాంతాలకు చెందిన అభిమానులతో ఐదో రోజు సమావేశం కొనసాగుతోంది. ఈరోజు చివరకల్లా పొలిటికల్ ఎంట్రీపై ఓ క్లారిటీ ఇస్తాడనే అంతా ఆశిస్తున్నారు. నిజానికి ఊగిసలాటలో ఉన్న రజనీ రాజకీయాలవైపే ఎక్కువ మొగ్గు చూపేలా వ్యాఖ్యలు చేయటం ఇక్కడ విశేషం.

రాష్ట్రంలో రాజకీయ వ్యవస్థ మారాల్సి వుందని, అది మనమే తీసుకురావాలని ఫ్యాన్స్ నుద్దేశించి చేసిన కామెంట్లే ఇందుకు ఉదాహరణ. అయితే యుద్ధం ఇప్పుడు కాదని, యుద్ధం వచ్చినప్పుడు చూద్దామని తనదైన శైలిలో మాట్లాడారు. ఆయన ప్రసంగంలో కరుణానిధి కుమారుడు, డీఎంకే చీఫ్ స్టాలిన్ పై పొగడ్తల వర్షం కురిపించటం విశేషం. స్టాలిన్ లో తనకో నేత కనిపిస్తాడని, ఆయన స్వతంత్రంగా నిర్ణయాలు తీసుకుంటే, అవి మరింత ఫలవంతమవుతాయని అన్నారు. తాను రాజకీయాల గురించి మాట్లాడిన మాటలు వివాదాస్పదమవుతాయని భావించలేదని అన్నారు.

అభిమానులే తనకు కొండంత బలమన్న రజనీ, వారు వెన్నంటి ఉండగా, తనకు అపజయమన్నదే కలగదన్న నమ్మకముందని చెప్పాడు. స్థానికతపై వస్తున్న విమర్శలను ప్రస్తావిస్తూ '40 ఏళ్లుగా తమిళనాడులోనే ఉంటున్నాను.. నేను తమిళుడినే'నని సూపర్ స్టార్ రజనీకాంత్ స్పష్టం చేశారు. కొందరు నేతలు, సోషల్ మీడియాలో వచ్చే విమర్శలను అస్సలు పట్టించుకోనని తేల్చిచెప్పాడు. సిస్టమ్ లోనే లోపాలు ఉన్నాయని తలైవా, చెడ్డ రాజకీయ నాయకులు ఉన్నచోటే మంచి నేతలు కూడా ఉంటారని వ్యాఖ్యానించాడు. మొత్తానికి పూర్తిగా రాజకీయ కోణంలో సాగుతున్న సమావేశంలో చివరగా ఏదో ఒక కంక్లూజన్ వచ్చే అవకాశం ఉందని భావిస్తున్నారు.