రివాల్వర్ రాణి వర్షా సాహూ అరెస్ట్.. తెలియని వరుడి అచూకీ

Posted: 05/18/2017 07:24 PM IST

సరిగ్గా పెళ్లి ముహూర్తం సమీపిస్తున్న సమయంలో అటుగా దూసుకువచ్చిన స్కార్పియో వాహనం నుంచి దిగి వరుడ్ని గన్ తో బెదిరించి.. అపహరించుకుని వెళ్లిన రివాల్వర్ రాణి అంశం దేశవ్యాప్తంగా సంచలనంగా మారింది. అయితే ఉత్తర్ ప్రదేశ్ లోని బుందేల్ ఖండ్ ప్రాంతానికి చెందిన రివాల్వర్ రాణిని పోలీసులు అదుపులోకి తీసుకున్నారు. అమెను విచారించిన పోలీసులు మరిన్నీ విషయాలను నిర్థారించుకునే పనిలో వున్నారు.

పాతికేళ్ల యువతి పేరు వర్షా సాహు.. తనతో పాటు బుందేల్ ఖండ్ ప్రాంతంలోని ఓ ప్రైవేటు క్లినిక్ లో కాంపౌండర్ గా పనిచేస్తున్న అశోక్ యాదవ్ తో ప్రేమలో పడింది. తాను మైనర్ గా వున్నప్పటి నుంచే తామిద్దరం ప్రేమించుకున్నామని, మేజర్ల అయిన తరువాత స్థానికంగా సహజీవనం కూడా చేస్తున్నామని వర్షా పోలీసులకు తెలిపింది. అయితే అశోక్ తల్లిదండ్రుల ఒత్తడితో మరో పెళ్లికి సిద్దమయ్యాడని.. తమ ప్రేమ వ్యవహారం వదువు కుటుంబ సభ్యులకు కూడా తెలుసుని చెప్పింది.

మరి రివాల్వర్ తీసుకుని ఎందుకు వరుడ్ని బెదిరించావని పోలీసులు అడిగిన ప్రశ్నించగా, ఆ వార్తలన్నీ అబద్దమని చెప్పింది. తాను అసలు ఏ తుపాకీని తీసుకుని వెళ్లలేదని అవన్నీ కేవలం కట్టుకథలని చెప్పింది. ఇక వరుడ్ని కూడా బలవంతంగా తీసుకెళ్లలేదని, తానే స్వయంగా అతని ఇష్టపూర్వకంగా తనతో వచ్చాడని తెలిపింది. తనను అశోక్ యాదవ్ ఎంతగానో ప్రేమిస్తున్నాడని కూడా చెప్పింది. ఈ మేరకు అమె పోలీసులకు ఇచ్చిన వాంగ్మూలంలో తెలిపింది. అయితే ఇప్పటికీ వరుడు మాత్రం కనిపించకపోవడం కొసమెరుపు.