బాహుబలి ప్రొడ్యూసర్ల ఇళ్లు, ఆఫీస్ లలో ఐటీ సోదాలు

Posted: 11/11/2016 05:20 PM IST

కరెన్సీ మార్పు నేపథ్యంలో చోటు చేసుకున్న పరిస్థితుల దృష్ట్యా నల్ల ధనం గురించి ఆదాయపు పన్నుల శాఖ ఓ కన్నేసిన విషయం తెలిసిందే. ఇందులో భాగంగా మొదటి షాక్ టాలీవుడ్ కే ఇచ్చారు అధికారులు. ఇండియా బిగ్గెస్ట్ మూవీ 'బాహుబలి' నిర్మాతలపై ఐటీ శాఖ కాసేపటి క్రితం దాడులు చేసింది.

హైదరాబాదులోని 'బాహుబలి' నిర్మాతలు శోభు యార్లగడ్డ, ప్రసాద్ దేవినేని ఇళ్లు, కార్యాలయాలపై ఐటీ శాఖాధికారులు ఏకకాలంలో దాడులు నిర్వహించారు. కాగా, భారతీయ సినీ పరిశ్రమలో బ్లాక్ మనీ వినియోగంపై పలు ఊహాగానాలు ప్రచారంలో ఉన్న సంగతి తెలిసిందే. ఈ నేపథ్యంలో 'బాహుబలి' నిర్మాతల ఇళ్లపై ఐటీ దాడులు ప్రాధాన్యత సంతరించుకున్నాయి. 120 కోట్ల బడ్జెట్ తో తెరకెక్కిన బాహుబలి ప్రపంచవ్యాప్తంగా 650 కోట్లు వసూలు చేసిన విషయం తెలిసిందే.

ఇక ఈ దాడులపై సీనియర్ దర్శకుడు, నిర్మాత తమ్మారెడ్డి భరద్వాజ స్పందించాడు. మీడియాలో హైలెట్ కావటం కోసమే ఐటీ అధికారులు దాడులు చేస్తున్నారని చెబుతున్నాడు. ఏం చేయాలో పాలుపోనీ అధికారులు ఇలా దాడుల ద్వారా మీడియాలో కనిపిస్తున్నారని, అయినా నిర్మాతలెవరూ డబ్బులను ఇళ్లలో పెట్టుకోరంటూ ఆయన వ్యాఖ్యానించాడు.

గతంలో రాజమౌళి సన్నిహితుడైన వారాహి నిర్మాణ సంస్థ అదినేత సాయి కొర్రపాటి ఇంట్లో ఐటీ దాడులు జరిగిన విిషయం తెలిసిందే.