రామాయణం మీద పరీక్ష.. ముస్లిం అమ్మాయే టాప్

Posted: 02/15/2016 12:53 PM IST

భారతదేశం అంటేనే సర్వమతాల సమ్మేళనం. మతాలు వేరయినా కానీ మనుషులు మాత్రం ఒక్కటే. అయితే గత కొంత కాలంగా మన దేశంలో అసహనం కుదిపేస్తోంది. కానీ ఓ పద్నాలుగేళ్ల అమ్మాయి మాత్రం మత సహనం అంటే ఏమిటో చెబుతోంది. తనకు తెలిసిందల్లా కేవలం చదువుకోవమే అయినా దానితోనే అందరికి కనువిప్పు కలిగిస్తోంది. ఆమె ఓ ముస్లిం అమ్మాయి అయినా కానీ ఆమెను కేవలం  ఖురాన్ మాత్రమే చదవాలని ఆమెకి ఎవరూ చెప్పలేదు... అందుకే రామాయాణం కూడా చదివింది. అంతేకాదు మహాభారతం కూడా త్వరలో ఔపోసన పట్టేస్తానని అంటోంది. ఇప్పుడు ఆ అమ్మాయిని మత సహనానికి నిదర్శనంగా చెప్పుకుంటున్నారు  ఎందుకు అనుకుంటున్నారా..? ఆ అమ్మాయి రామాయణాన్ని అవపోసన పట్టింది.

కర్ణాటకలో రాష్ట్రస్థాయి రామాయణంపై పెట్టిన పరీక్షలో ఆమె మొదటి స్థానంలో నిలిచింది. ఆ పరీక్షలో 93 శాతం మార్కులు తెచ్చుకుంది. దీనిని భారత సంస్కృతి ప్రతిష్ఠాన్ సంస్థ గత ఏడాది నవంబర్లో నిర్వహించింది. వాటి ఫలితాలు ఇప్పుడు వచ్చాయి. కర్ణాటక - కేరళ సరిహద్దులో ఉండే సుల్లియపడవు గ్రామంలో సర్వోదయ హైస్కూల్ లో తొమ్మిదో తరగతి చదువుతోంది రహీలా. ఆ స్కూలు నుంచి 39 మంది ఈ రామయణం రాత పరీక్షలో పాల్గొన్నారు. ఆమె తన అంకుల్ సాయంతో రామాయణం చదువుకున్నానని తెలిపింది. ఆమె తండ్రి ఓ ఫ్యాక్టరీలో పనివాడు. త్వరలో మహాభారతంపై కూడా రాత పరీక్ష జరుగబోతోంది. ఆ పరీక్షలో టాపర్ గా నిలవాలని రహీలా కోరుకుంటోంది.