షీనా హత్య వెనుక అసలు మిస్టరీ చెప్పిన ఇంద్రాణి

Posted: 08/31/2015 03:00 PM IST

Sheena bora murder mystery reveal indrani mukherjea mumbai police investigation

దేశవ్యాప్తంగా సంచలనం సృష్టించిన షీనాబోరా హత్య కేసులో ఎట్టకేలకు అసలు మిస్టరీ వీడింది. ఆమెను తాను ఎందుకు చంపిందో పోలీసుల విచారణలో భాగంగా ఇంద్రాణి ముఖర్జియా వెల్లడించింది. తన గత జీవితానికి సంబంధించిన రహస్యాలను బయటపెడతానని షీనా నిత్యం తనని బెదిరించేదని, కాలక్రమంలో ఆమె బెదిరింపులు మరింత పెరిగిపోవడంతో ఆమెపై తాను అసహ్యాన్ని పెంచుకున్నట్లు ఇంద్రాణి చెప్పినట్లు పోలీసు వర్గాలు వెల్లడించాయి. అయితే.. షీనాను చంపాలన్న ఉద్దేశం తనకి లేదని, అనుకోని పరిస్థితుల్లో అలా జరిగిపోయిందని ఇంద్రాణి చెప్పినట్లు వారు పేర్కొన్నారు.

ఈ విచారణలో భాగంగా ఇంద్రాణి మరిన్ని వివరాలు వివరిస్తూ.. షీనా, తాను ఇద్దరూ ఓ ఆర్థిక వివాదంలో కూరుకుపోయామని తెలిపింది. అలాగే.. తమ మధ్య తరచూ గొడవలు వస్తుండేవని, ఎక్కువసార్లు పోట్లాటవరకు కూడా వెళ్లాయని చెప్పింది. ఒక సందర్భంలో తాను భారీ మొత్తంలో నగదును ఆమె ఖాతాలో వేసి, ఆపై తిరిగి ఇవ్వాలని కోరితే.. షీనా అందుకు తిరస్కరించిందని విచారణలో వెల్లడించింది. పీటర్ తో వివాహానికి ముందు తన జీవితంలోని రహస్యాలను బయటపెడతానని నిత్యం బెదిరించేదని వివరించింది. తాను రాహుల్, షీనాలను విడదీసేందుకు ఎన్నో ప్రయత్నాలు చేశానని, అన్నీ విఫలమైన తరువాతే ఈ ఘటనలు చోటు చేసుకున్నాయని తెలిపినట్టు సమాచారం. అయితే.. షీనా హత్యవెనుక మరేదో బలమైన కారణం వుండవచ్చునని తాము భావిస్తున్నట్లు పోలీసులు తెలుపుతున్నారు. ఇంద్రాణి కావాలనే కథ అల్లుతోందని, అంతకుమించి ఇంకో రీజన్ అయి వుంటుందని వారు అనుమానిస్తున్నారు. అందుకే.. సమగ్ర సమాచారాన్ని తెలుసుకునేందుకు విచారణ మరింత తీవ్రం చేసినట్లు తెలుస్తోంది.

ఇదిలావుండగా.. కస్టడీలో వున్న ఇంద్రాణి నుంచి నిజం చెప్పించేందుకు పోలీసులు థర్డ్ డిగ్రీ ఉపయోగించారట. ఆమె చెంపలు వాయించారని, లాఠీలతో కొట్టారని ఇంద్రాణి తరపు న్యాయవాది ఆరోపించారు. తన క్లయింటు పట్ల పోలీసులు దారుణంగా ప్రవర్తించారని తెలిపారు. ఈ మేరకు ముంబై పోలీసు కమిషనర్ ను కలిసి ఫిర్యాదు చేశారు. నేరాన్ని అంగీకరించాలని ఇంద్రాణిని బలవంతం చేస్తున్నారని తెలిపారు. మరోవైపు.. సోమవారంతో ఇంద్రాణి కస్టడీ ముగియడంతో.. ఆమెతోపాటు సంజీవ్ ఖన్నా కుమార్తె విధిలను పోలీసులు కోర్టులో హాజరు పరిచారు. కేసులో మరిన్ని వివరాలు రాబట్టాల్సి వున్నందున, ఇంకొన్ని రోజుల పాటు ఆమెను ప్రశ్నించేందుకు అనుమతించాలని ముంబై పోలీసులు పిటిషన్ దాఖలు చేశారు.

AS