పోలీసులు వస్తున్నారని.. తాళికట్టిన పెళ్లికోడుకు పరార్..!

Posted: 04/30/2015 05:43 PM IST

విశాఖపట్నంలో జిల్లాలో మైనర్ బాలిక వివాహం కలకలం రేపింది. మైనర్ బాలికల వివాహాలకు అడ్డుఅదుపు లేకుండా సాగుతున్నాయన్న వాదనలు బలంగా వినబడుతున్నాయి. విశాఖ ఏజెన్సీ ప్రాంతాల నుంచి.. చిన్న చిన్న పట్టణ ప్రాంతాల వరకు అన్ని చోట్ల బాల్య వివాహాలు జరుగుతున్న ప్రభుత్వం కానీ, పోలీసులు కానీ, సంబంధిత అధికారులు కానీ చర్యలు తీసుకున్న దాఖలాలు లేవు. ముక్కుపచ్చలారని బాలికలు పెళ్లి కూతుళ్లుగా మారి.. అత్తరిటి ఆరళ్లకు బలవుతున్న ఘటనలు అనేకం చోటుచేసుకుంటున్నా ప్రభుత్వాలు మాత్రం పట్టనట్టు వ్యవహరిస్తున్నాయి.

ఎందరో సంఘసంస్కర్తలు పోరాటాల ఫలితంగా అదృశ్యమైన బాల్యవివాహాలు మళ్లీ విశాఖ, విజయనగరం ప్రాంతాల్లో అధికంగా నమోదవుతున్నాయి. వీటిపై మహిళా శిశు సంక్షేమ శాఖ అధికారులు కూడా చూసిచూడనట్టుగా వ్యవహరిస్తున్నారన్న విమర్శలు వ్యక్తమవుతున్నాయి. తాజాగా విశాఖపట్నంలోని పెదవాల్తేరు ప్రాంతంలో గురువారం బాల్యవివాహం జరిగింది. మైనర్ బాలికను పెళ్లి పేరుతో అత్యంత చిన్న వయస్సులో మరోకరికి కట్టబెట్టడం ఇష్టలేని స్థానికులు కోందరు ఈ బాల్య వివాహంపై పోలీసులకు ఫిర్యాదు చేశారు. సమాచరం అందుకున్న పోలీసులు హుటాహుటిన వివాహ వేదిక వద్దకు చేరుకున్నారు. ఈ తతంగం గురించి తెలుసుకున్న పెళ్లికొడుకు హడావుడిగా మైనర్ బాలికకు తాళికట్టి తన పని కానిచ్చేశాడు.  అంతేకాదు.. అప్పటి వరకు ధైర్యంగా ఏం చేస్తారో చేసుకోండంటూ భీష్మించిన పెళ్లికోడుకు పోలీసులు చూసి పరారైయ్యాడు. దాంతో పోలీసులు బాలిక తల్లిదండ్రులతోపాటు పెళ్లికొడుకు తల్లిదండ్రులను పోలీసు స్టేషన్కు తరలించి... విచారిస్తున్నారు.

జి. మనోహర్