‘సునంద’ హత్యలో ‘ఐపీఎల్’ కోణం ! థరూర్ కు ఉచ్చు...?

Posted: 01/10/2015 08:03 AM IST

సంచలనం రేపిన సునంద పుష్కర్ హత్య కేసులో సిట్ పోలిసులకు రోజుకో కొత్త విషయం తెలుస్తోంది. గురువారం పనిమనిషిని విచారించగా.., సునందతో చివరి రెండ్రోజులు సునీల్ అనే వ్యక్తి ఉన్నట్లు తెలుసుకున్నారు. సునీల్ ను విచారించగా అతడు ఐపీఎల్ గురించి కీలక సమాచారం అందించినట్లు తెలుస్తోంది. హత్యకు రెండ్రోజుల ముందు ఎయిర్ పోర్టులో శశి థరూర్ తో సునంద గొడవపడిందనీ.., ఇంటికి వెళ్ళేందుకు కూడా నిరాకరించిందని సునీల్ చెప్పాడు. ఇదే సమయంలో తనకు ఫోన్ చేయటంతో ఎయిర్ పోర్టుకు వెళ్లానని పోలిసులకు తెలిపాడు.

ఇద్దరం కలిసి లీలా హోటల్ లో రూమ్ నెం.307లో ఉన్నట్లు చెప్పాడు. గొడవ నుంచి ప్రశాంతంగా ఉండాలని సునందను కోరినట్లు పోలిసులకు వివరించాడు. ఇదే సమయంలో ఐపీఎల్ గురించి కొన్ని విషయాలు చెప్పాలనీ.., ఇందుకోసం ప్రెస్ మీట్ పెట్టాలని సునంద తనకు చెప్పిందన్నాడు. అయితే ఐపీఎల్ గురించి ఏం చెప్పాలనుకుందో తెలియదన్నారు. ప్రెస్ మీట్ పెట్టాలి అనుకున్న 17వ తేదీనే సునంద హత్యకు గురయిందని వెల్లడించాడు. సింగ్ అనే మరో వ్యక్తిని ప్రశ్నించినపుడు కూడా ఐపీఎల్ గురించి ఏదో మాట్లాడాలి అని సునంద తనతో చెప్పిందన్నాడు. ఇద్దరు వ్యక్తులూ ఐపీఎల్ వ్యవహారంను ప్రస్తావించటంతో ఈ కోణంలో పోలిసులు విచారణ మొదలు పెట్టారు.

థరూర్ కు బిగుస్తున్న ఉచ్చు... ?

సునంద పుష్కర్ హత్య కేసులో ఆమె భర్త శశి థరూర్ కు ప్రమేయం ఉందని ఇప్పటికే అనుమానాలు వ్యక్తం అయ్యాయి. తాజాగా ఐపీఎల్ వ్యవహారంతో ఇవి మరింత బలపడుతున్నాయి. గతంలో ఐపీఎల్ కొచ్చి ఫ్రాంచైజీ విషయంలో థరూర్ పై ఆరోపణలు వచ్చాయి. తాజాగా సునంద ఐపీఎల్ పై ప్రెస్ మీట్ పెట్టాలని నిర్ణయించుకున్నట్లు ఇద్దరు సాక్షులు చెప్పటంతో ఈ అనుమానాలకు మరింత బలం చేకూరుతోంది. అయితే పోలిసులు ఇప్పుడే థరూర్ ను నిందితుడిగా చూపకుండా అన్ని ఆధారాలు సేకరించే పనిలో ఉన్నారు.

లీలా హోటల్ కు వెళ్ళే ముందు ఎయిర్ పోర్టులో సునంద-థరూర్ మద్య గొడవ జరిగినట్లు సన్నిహితులు చెప్తున్నారు. ఈ కారణంగా ఇంటికి వెళ్ళేందుకు మృతురాలు నిరాకరించిందని అంటున్నారు. థరూర్ బలవంతం చేయటంతో సునంద చెంపదెబ్బ కొట్టిందట. దీంతో భార్యను ఎయిర్ పోర్టులోనే వదిలి థరూర్ మాత్రం ఇంటికి వెళ్ళిపోయాడని విచారణలో వెల్లడి అయింది. వీరి గొడవకు కారణం ఏమిటి అనే అంశంపై కూడా పోలిసులు విచారణ చేపడుతున్నారు.