కోడి పందాలుంటాయా.., ఉండవా? వీడని ఉత్కంఠ

Posted: 01/09/2015 01:00 PM IST

ఆంధ్రప్రదేశ్ లో ప్రతిష్టాత్మకంగా జరిగే కోడి పందాలపై ఉత్కంఠ వీడటం లేదు. పందాలపై విచారణను సుప్రీంకోర్టు సోమవారంకు వాయిదా వేసింది. దీంతో పందాలు ఉంటాయా.., ఉండవా అని పందెం రాయుళ్ళు ఉత్కంఠగా ఎదురు చూస్తున్నారు. ఏటా సంక్రాంతి సమయంలో ఆంధ్రప్రదేశ్ లో కోడి పందాలు జరగటం ఆనవాయితీగా వస్తోంది. లక్షల రూపాయలు చేతులు మారే ఈ పందాలు కేవలం సంక్రాంతి సమయంలోనే జరుగటం విశేషం. ఇందుకోసం రాష్ర్టం నలుమూలల నుంచి పందెంరాయుళ్లు కోనసీమకు తరలివస్తారు.

అయితే కొద్దికాలంగా పోలిసులు, ప్రభుత్వం కోడి పందాలపై కఠినంగా వ్యవహరిస్తున్న విషయం తెలిసిందే. పందెంను జూదంగా, జీవహింసగా పరిగణిస్తూ ప్రభుత్వం నిషేధించటంతో పోలిసులు చర్యలు చేపడుతున్నారు. పందెం కోళ్ళు కన్పిస్తే స్వాధీనం చేసుకోవటంతో పాటు, నిర్వాహకులపై కేసులు పెడుతున్నారు. దీనిపై కోనసీమ వాసుల నుంచి వ్యతిరేకత వస్తోంది. కేవలం పండగ సమయంలో సంతోషంగా జరుపుకునే ఈ పందాలు సాంప్రదాయంగా వస్తున్నాయనీ.. వాటిని అడ్డుకోవద్దని కోరుతున్నారు. ఇదే అంశంపై పందాలను నిషేధిస్తూ హైకోర్టు ఇచ్చిన తీర్పుకు వ్యతిరేకంగా ఎంపీ మురళీ మోహన్ సుప్రీంకోర్టును ఆశ్రయించాడు.

మరోవైపు జంతు ప్రేమికులు ఈ పందాలను వ్యతిరేకిస్తున్నారు. వినోదం పేరుతో కోళ్ళను హింసించి చంపేసే ఆటలను ప్రోత్సహించవద్దని కోరుతున్నారు. ఇలా భిన్న వాదనల నేపథ్యంలో కేసు విచారణ వాయిదా పడటంతో చివరి నిమిషంలో అయినా తమకు అనుకూలంగా తీర్పు వస్తుందా రాదా అని పందెం రాయుళ్ళు ఎదురుచూస్తున్నారు. అటు వేల రూపాయలు ఖర్చుపెట్టి పందాల కోసం కోళ్లను పెంచిన వారయితే కోర్టు తీర్పు వ్యతిరేకంగా వస్తే తమకు లక్షల రూపాయల నష్టం వస్తుందని ఇప్పటినుంచే ఆందోళన వ్యక్తం చేస్తున్నారు.