రామ్ చరణ్ ఇంటికి అనుకోని అతిథి

Posted: 06/25/2014 01:56 PM IST

మంగళవారం రాత్రి హీరో రామ్ చరణ్ ఇంటిలోకి అనుకోని అతిథి వచ్చింది.  అది దాదాపు రెండు మీటర్ల పొడవున్న విషసర్పం.  

భయానకమైన ఆ పాము తన ఇంటికి వచ్చిన విషయాన్ని రామ్ చరణ్ వెంటనే తన అభిమానులతో పంచుకున్నారే కానీ దిగ్భ్రాంతికి గురికాలేదు.  అంతేకాదు, భయపడ్డవాళ్ళే ఎక్కువగా హింసాత్మక చర్యలకు పూనుకుంటారనే సత్యాన్ని నిజం చేస్తూ ధైర్యంగా ఉన్న రామ్ చరణ్ ఆ పాముని చంపే ఆదేశాలేమీ ఇవ్వలేదు.  దాన్ని పట్టుకుని స్నేక్ సొసైటీకి విషయాన్ని తెలియజేసారు.

తెలియక మనుషులుండే నివాసాలలోకి అదాటుగా వెళ్ళే పాములను జాగ్రత్తగా తీసుకెళ్ళి అడవిలో వదిలిపెట్టే ఆ స్వచ్ఛంద సంస్థకు ఆ పాముని అప్పగించటం జరిగింది.  

పాము ఫొటోని, జరిగిన విషయాన్ని అభిమానులతో పంచుకున్న రామ్ చరణ్ కి అభిమానుల నుంచే కాకుండా పలువురు జంతు ప్రేమికుల దగ్గర్నుంచి కూడా అభినందనలు వెల్లువగా వస్తున్నాయి.  

-శ్రీజ