పార్లమెంట్ లో కనీవినీ ఎరుగని రీతిలో ఉద్రిక్తతలు

Posted: 02/13/2014 12:57 PM IST

T bill triggered violence in and around parliament house

పార్లమెంట్ లో ఎప్పుడూ లేని విధంగా లోపలా బయటా కూడా ఉద్రిక్తతలు చోటుచేసుకున్నాయి.

పార్లమెంటులో రాష్ట్ర విభజన బిల్లును ప్రవేశపెట్టటంతో లోపల, ఈ లోపులో బిల్లు ప్రవేశపెడతారని తెలిసి పార్లమెంటు బయట ఉద్రిక్త వాతావరణం చోటుచేసుకుంది. కేవలం ఎంపీలు, మీడియా ప్రతినిధులను మాత్రమే పార్లమెంటు ఆవరణలోకి అనుమతించిన పోలీసు బలగాలు మాజీ ఎంపీలు, ఎమ్మెల్యేలను సైతం అక్కడి నుండి తరిమి కొట్టారు. పెద్ద ఎత్తున అక్కడికి చేరుకున్న సీమాంధ్ర తెలంగాణా ప్రాంత ఆందోళనకారులను పోలీసులు అక్కడినుండి ఈడ్చుకుని పోయారు. అయినా ఊహించినదానికంటే ఎక్కువ సంఖ్యలో అక్కడికి చేరుకున్న ఆందోళనకారులను నియంత్రించటం పోలీసులకు కష్టమే అయింది.

ఇక పార్లమెంటు లోపల అనుకున్న ప్రకారం స్పీకర్ మీరా కుమార్ మధ్యాహ్నం 12 గంటలకు రాష్ట్ర విభజన బిల్లును ప్రవేశపెట్టారు. వెంటనే సీమాంధ్ర ఎంపీలు ఒక్కసారిగా సమైక్యాంధ్ర నినాదాలు చేస్తూ మైకులు ఫైళ్ళను చిందరవందర చేసారు.

లగడపాటి రాజగోపాల్ మిరియాల పొడిని స్ప్రే చేసారు. జరిగిందేమిటో తెలిసే లోపులో ఎంపీలకు దగ్గులు కళ్ళు మండటం జరిగి ఉక్కిరిబిక్కిరయ్యారు. తెలంగాణా ఎంపీలు లగడపాటిని పక్కకు లాగేసారు. మిరియాల పొడి తన మీద కూడా ప్రభావం చూపటంతో లగడపాటి అపస్మాస్థితిలోకి పోయారు. లగడపాటిమీద ఇతర ఎంపీలు దాడి చేయబోగా సెక్యూరిటీ సిబ్బంది అడ్డుకున్నారు. లగడపాటితో పాటు మరో ముగ్గురు ఎంపీలను ఆంబులెన్స్ లో వైద్య చికిత్స కోసం తీసుకెళ్ళవలసివచ్చింది. అందులో పొన్నం ప్రభాకర్ ఉన్నారు.

లోక్ సభ వాయిదా పడింది. కానీ లోక్ సభలో భౌతిక దాడులు మాత్రం ఆగలేదు. ముష్టిఘాతాలతో ఒకరి మీదొకరు ప్రహారాలు చేసుకున్నారు. తెదేపా ఎంపీ వేణుగోపాల రెడ్డి సభలోకి కత్తి కూడా తీసుకునివచ్చారు. ఎంపీల పోరాటాలను అడ్డుకోవటానికి మార్షల్స్ రంగప్రవేశం చెయ్యవలసివచ్చింది. పెప్పర్ స్ప్రే వలన భాజపా నాయకురాలు సుష్మా స్వరాజ్ కి కూడా అస్వస్థతకు లోనయినట్లుగా తెలిసింది.

సెక్రటరీ జనరల్ టేబుల్ మీద అద్దాన్ని పగలగొట్టి, మోదుగుల వేణుగోపాల రెడ్డి ఆత్మహత్య కూడా చేసుకునే ప్రయత్నం చేసారు.

-శ్రీజ