Posted: 01/02/2013 10:10 AM IST

అనంతపురం స్థానిక కాంగ్రెస్ నాయకుడు అయిన సుధాకర్ రెడ్డిని హత్య చేసుకుందుకు కుట్ర పన్నారనే ఆరోపణలు ఎదుర్కొంటున్న టీడీపీ ఎమ్మెల్యే పరిటాల సునీత కుమారుడు పరిటాల శ్రీరామ్ ని అరెస్టు చేసేందుకు పోలీసులు తనిఖీలు ముమ్మరం చేశారు. సుధాకర్ రెడ్డి ధర్మవరం పోలీస్ స్టేషన్ లో ఫిర్యాదు మేరకు కేసు నమోదు చేసుకున్నారు. అయితే గత రెండు రోజుల నుండి కనిపించడా తప్పించుకు తిరుగుతున్న శ్రీరామ్ కోసం పోలీసులు గాలిస్తున్నారు. కాగా అనంతపురం అరవింద్ నగర్ లో ఉంటున్న పరిటాల సునీత ఇంట్లో,  పరిటాల రవి స్వగ్రామం వెంకటాపురంతో పాటు, గంగంపల్లిలో పరిటాల చిన్నాన్న గజలప్ప నివాసంతో పాటు, బంధువుల ఇళ్లలోనూ పోలీసులు సోదాలు నిర్వహించారు . పోలీసుల తనిఖీల పై ఎమ్మెల్యే సునీత తీవ్రంగా మండిపడ్డారు. ముందస్తు అనుమతి లేకుండా ఇలా సోదాలు చేయడం ఏమిటని ఆమె ప్రశ్నించారు. ఒక ఎమ్మెల్యే ఇంటిని పోలీసులు తనిఖీలు చేయాలంటే ముందుగా స్పీకర్‌ అనుమతి కావాలని, అదేమీ లేకుండా తనిఖీలు చేస్తారా అని ఆమె మండిపడ్డారు. దీనిపై స్పీకర్‌కు ఫిర్యాదు చేస్తానని సునీత తెలిపారు. తన కొడుకును ఏదైనా చేస్తారేమోనని ఆమె ఆందోళన వ్యక్తం చేశారు. మొత్తానికి అనంతపురంలో టెన్షన్ వాతావరణం నెలకొంది.