Posted: 08/14/2012 01:39 PM IST

నిన్నటి వరకు జనజీవనంతో  కళకళాడిన  ఆ కాలనీ నేడు ఖాళీ  ఇళ్లతో  దర్శనమిస్తోంది.  నిత్యం సందడిగా కనిపించే  రహదారులు బోసిపోతున్నాయి.  హైదరాబాద్  హైటెక్  సిటీకి  కూతవేటు  దూరంలో ఉన్న సిద్దిక్ నగర్ లో  రెండు రోజులుగా  చోటు చేసుకుంటున్న పరిణామాలివి.  ఓ వర్గం వారు తెల్లారేసరికి ఇళ్లు ఖాళీ చేసి వెళ్లిపోవాలని హెచ్చరించడంతో  అస్సాం రాష్ట్రం నుంచి వలస వచ్చిన ప్రజలు ప్రాణభయంతో  సొంత ఊళ్లకు  పయనమవుతున్నారు.  ఇంత జరుగుతున్నా  సంబంధిత అధికారులు  పట్టించుకోకపోవడం గమనార్హం.

అస్సాం రాష్ట్రానికి  చెందిన దాదాపు రెండు వేల మంది సిద్దిక్ నగర్ లోనివాసముంటున్నారు.  వీరు సమీపంలోని ఐటీ కంపెనీల్లో  సెక్యూరిటీ గార్డులుగా, భవన  నిర్మాణాల్లో  కూలీ లుగా పనిచేస్తుంటారు. గత ఐదారేళ్లుగా  ఇక్కడే  ఉంటున్నారు.  బస్తీలో  ఏ చిన్న కార్యక్రమం జరిగినా స్థానికులతో కలిసి  పాల్గొంటూ ఉంటారు.   ఈ పరిస్థితుల్లో హఠాత్తుగా వారు ఇళ్లు  ఖాళీ చేసి  వెళ్లిపోతుండడం పై  స్థానికులు విచారం వ్యక్తం చేస్తున్నారు.  ఆది సోమవారాల్లో  దాదాపు 1000 మంది తట్టాబుట్టా  సర్థుకుని  వెళ్లిపోయారు.  వారు ఉద్యోగాలు చేస్తున్న  కంపెనీ ప్రతినిధులు  వచ్చి మీకెలాంటి అపాయం  లేదు. అవసరమైతే  మా సంస్థల్లోనే ఆశ్రయం  కల్పిస్తాం  అని భరోసా  ఇచ్చినా వారు ఆగలేదు.  సైకిళ్లు , సిలిండర్లు , వంటపాత్రలు, మంచాలు వంటి సామగ్రిని  అయినకాడికి అమ్ముకొని వెళ్లిపోతున్నట్లు తెలిసింది.

ఇటీవల  అస్సాంతో పాటు ముంబయిలో  చోటుచేసుకున్న  సంఘటనల ప్రభావం  నగరంపై పడింది.  అస్సాంకు  చెందిన వారంతా ఇళ్లు ఖాళీ చేసి  వెళ్లిపోవాలని గుర్తు తెలియని  వ్యక్తులు  ప్రచారం  చేసినట్లు  స్థానికులు చెబుతున్నారు. సోమవారం రాత్రి 10 గంటల్లోగా ఖాళీ  చేయకపోతే  చంపేస్తామని బెదిరించినట్లు  వదంతులు వ్యాపించడంతో  భయాందోళనకు గురై సొంత ఊళ్లకు  వెళ్లిపోయినట్లు తెలుస్తోంది.