Posted: 04/01/2012 01:09 PM IST

            కోర్టు ముందు ఎంతగా వేడుకున్నా శ్రీలక్ష్మీ, విజయసాయిరెడ్డి ఇంకా కటకటాల్లోనే మగ్గే పరిస్థితి దాపురించింది.  ఓఎంసీ కేసులో నిందితురాలు, సీనియర్ ఐఏఎస్ అధికారిణి వై. శ్రీలక్ష్మి సీబీఐ రిమాండ్‌ను కోర్టు పొడిగించింది. ఈ కేసులో శ్రీలక్ష్మిపై అభియోగాలు మోపుతూ సీబీఐ అదనపు చార్జ్‌షీట్ దాఖలు చేసిన సంగతి తెలిసిందే. ఆమెను రిమాండ్‌కు పంపి 90 రోజులు పూర్తి కావడంతో శ్రీలక్ష్మిని కోర్టులో హాజరుపరిచారు. అభియోగాల పరిశీలనకు సమయం పడుతుందని పేర్కొన్న న్యాయమూర్తి, ఆమె రిమాండ్‌ను ఏప్రిల్ 13 వరకు పొడిగించారు.  రిమాండ్ పొడిగింపుతో అధికారులు ఆమెను చంచల్‌గూడ మహిళా జైలుకు తీసుకెళ్లారు.
            కాగా, జగతి పబ్లికేషన్స్ కేసులో ఏ2గా ఉన్న విజయసాయిరెడ్డికి కూడా ఏప్రిల్ 13 వరకు సీబీఐ కోర్టు రిమాండ్ పొడిగించింది.  చివరకు ఈ కేసులో చార్జిషీటు దాఖలవడంతో సాయిరెడ్డి రిమాండ్‌ను పొడిగిస్తూ న్యాయమూర్తి నాగమారుతీ శర్మ ఆదేశాలిచ్చారు. ఈ సందర్భంగా డిఫెన్స్ న్యాయవాది విజ్ఞప్తి మేరకు చార్జ్ షీట్ ప్రతిని తీసుకునేందుకు కోర్టు అనుమతించింది. దీంతో వీరిద్దరికీ కోర్టులో చుక్కెదురైనట్లైంది.

...avnk